ប្រធានាធិបតីកូរ៉េខាងត្បូង លោក Lee Jae Myung បានប្តេជ្ញាក្នុងថ្ងៃព្រហស្បតិ៍ (០៣ កក្កដា) នេះថានឹងអនុវត្តគោលនយោបាយសារពើពន្ធ "ដ៏ក្លាហានមួយ" ក្នុងការជំរុញសេដ្ឋកិច្ចដែលកំពុងចុះខ្សោយ បន្ទាប់ពីវិបត្តិច្បាប់អាជ្ញាសឹករបស់ប្រទេស និងដើម្បីដោះស្រាយបញ្ហាប្រឈមដែលបណ្តាលមកពីការដំឡើងពន្ធរបស់សហរដ្ឋអាមេរិក និងបញ្ហាកូរ៉េខាងជើង។

លោក Lee ដែលជាប់ឆ្នោតកាលពីថ្ងៃទី០៣ ខែមិថុនា បាននិយាយថា អាទិភាពចម្បងរបស់លោកគឺការធ្វើឱ្យប្រសើរឡើងនូវជីវភាពរស់នៅរបស់ប្រជាជនកូរ៉េខាងត្បូង ខណៈជំនឿទុកចិត្តរបស់ពលរដ្ឋលើរដ្ឋាភិបាលរបស់លោកបានរង្គោះរង្គើយ៉ាងខ្លាំងដោយសារ "វិបត្តិជាតិ" ដែលប៉ះពាល់ដល់សេដ្ឋកិច្ចធំជាងគេទី៤ របស់អាស៊ីមួយនេះ។

ថ្លែងក្នុងសុន្ទរកថាបើកនៅសន្និសីទសារព័ត៌មានដើម្បីប្រារព្ធខួបកាន់តំណែងបាន ៣៤០ថ្ងៃ លោក Lee បានសន្យាអនុវត្តគោលនយោបាយសារពើពន្ធដ៏ធំ ដោយនិយាយថា "នេះជាពេលដែលតួនាទីបុរេសកម្ម និងក្លាហាននៃហិរញ្ញវត្ថុជាតិ មានសារៈសំខាន់ជាងពេលណាៗទាំងអស់"។

រដ្ឋបាលរបស់លោក Lee បានស្នើការចំណាយបន្ថែមរបស់រដ្ឋាភិបាលចំនួន ១៤,៧ពាន់លានដុល្លារ ដើម្បីគាំទ្រដល់តម្រូវការក្នុងស្រុកដែលធ្លាក់ចុះ។ សភា ដែលគ្រប់គ្រងដោយបក្សប្រជាធិបតេយ្យរបស់លោក រំពឹងថានឹងបោះឆ្នោតគាំទ្រលើច្បាប់ថវិកានេះក្នុងពេលឆាប់ៗ៕