សារព័ត៌មាន Al Jazeera បានរាយការណ៍ដោយដកស្រង់ប្រភពរដ្ឋាភិបាលស៊ីរីថា រដ្ឋាភិបាលស៊ីរី នឹងមិនពិភាក្សាអំពីសន្ធិសញ្ញាសន្តិភាពជាមួយអ៊ីស្រាអែលទេ ដរាបណាកងទ័ពរបស់ប្រទេសនេះ នៅតែមាននៅលើទឹកដីស៊ីរី។

ប្រភពបាននិយាយថា៖«នឹងមិនមានការចរចាអំពីកិច្ចព្រមព្រៀងថ្មីទេ ប្រសិនបើអ៊ីស្រាអែល មិនបានអនុវត្តទាំងស្រុងនូវកិច្ចព្រមព្រៀងបញ្ចប់សង្គ្រាម ឆ្នាំ ១៩៧៤ និងដកកងទ័ពចេញពីតំបន់ដែលខ្លួនបាន      គ្រប់គ្រង។

លោកបានបន្ថែមថា របាយការណ៍ណាមួយអំពីលទ្ធភាពនៃការចុះហត្ថលេខាលើសន្ធិសញ្ញាសន្តិភាពរវាងស៊ីរី និងអ៊ីស្រាអែល «គឺមិនទាន់ដល់ពេល នៅក្នុងដំណាក់កាលនេះទេ»។

គេហទំព័រ Axios បានរាយការណ៍កាលពីថ្ងៃទី ៣០ ខែមិថុនា ដោយដកស្រង់សម្តីមន្ត្រីអាមេរិកថា សហរដ្ឋអាមេរិក បាននិងកំពុងពិភាក្សាជាមួយអ៊ីស្រាអែល និងស៊ីរីអំពីលទ្ធភាពនៃកិច្ចព្រមព្រៀងសន្តិសុខរវាងប្រទេសទាំងពីរនេះ។ យោងតាមការចុះផ្សាយនេះ ភាគីទាំងពីរ កំពុងពិភាក្សាគ្នាជាបឋម។

បន្ទាប់ពីការផ្លាស់ប្តូរអំណាចនៅក្នុងប្រទេសស៊ីរី នៅដើមខែធ្នូ ឆ្នាំ ២០២៤ យោធាអ៊ីស្រាអែលបានប្រកាសថា ខ្លួនបានកាន់កាប់ទីតាំងនៅតំបន់ទ្រនាប់នៅតំបន់ខ្ពង់រាប Golan Heights ដែលបានខណ្ឌចែកទឹកដីដែលគ្រប់គ្រងដោយអ៊ីស្រាអែល និងស៊ីរី ចាប់តាំងពីឆ្នាំ ១៩៧៤។ ក្នុងចំណោមទឹកដីផ្សេងទៀត ប្រទេសនេះ បានកាន់កាប់ផ្នែកខាងស៊ីរីនៃភ្នំ Hermon ដោយមិនប្រឈមមុខនឹងការតស៊ូ។ នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា កិច្ចព្រមព្រៀងបញ្ចប់សង្គ្រាម ឆ្នាំ ១៩៧៤ ជាមួយស៊ីរី លែងមានសុពលភាពទៀតហើយ បន្ទាប់ពីទាហានស៊ីរី បានចាកចេញពីតំបន់នេះ បន្ទាប់ពីមានការផ្លាស់ប្តូររដ្ឋាភិបាលនៅទីក្រុងដាម៉ាស ( Damascus) ។