ចៅក្រមសហព័ន្ធកាលពីថ្ងៃពុធ (០២ កក្កដា) បានចេញដីការារាំងការហាមឃាត់សិទ្ធិជ្រកកោនរបស់លោកប្រធានាធិបតី Donald Trump នៅឯព្រំដែនសហរដ្ឋអាមេរិក-ម៉ិកស៊ិក ដោយនិយាយថា លោក Trump បានធ្វើហួសពីសិទ្ធិអំណាចរបស់លោក នៅពេលចេញសេចក្តីប្រកាសមួយថា អន្តោប្រវេសន៍ខុសច្បាប់ជាគ្រាអាសន្ន និងមិនអើពើនូវដំណើរការផ្លូវច្បាប់ដែលមានស្រាប់។

ចៅក្រមប្រចាំតំបន់អាមេរិក លោក Randolph Moss បាននិយាយនៅក្នុងអត្ថបទបញ្ចេញមតិ ១២៨ទំព័រមួយថា សេចក្ដីកាសថ្ងៃទី២០ ខែមករា របស់លោក Trump ដោយរារាំងជនអន្តោប្រវេសន៍ទាំងអស់ "ដែលចូលរួមក្នុងការឈ្លានពានឆ្លងកាត់ព្រំដែនភាគខាងត្បូង" មិនឱ្យស្វែងរកសិទ្ធិជ្រកកោន ឬការការពារមនុស្សធម៌ផ្សេងទៀត បានដើរហួសពីអំណាចប្រធានាធិបតីរបស់លោក។

សេចក្តីសម្រេចនេះគឺជាជំហានថយក្រោយមួយសម្រាប់លោក Trump មកពីបក្សសាធារណរដ្ឋ ដែលបានដណ្តើមយកកៅអីសេតវិមានឡើងវិញដោយសន្យាថានឹងមានការបង្ក្រាបអន្តោប្រវេសន៍ដ៏ធំ។ ចាប់តាំងពីលោក Trump ចូលកាន់តំណែងមក ចំនួនជនអន្តោប្រវេសន៍ដែលចាប់បានឆ្លងដែនខុសច្បាប់ បានធ្លាក់ចុះដល់កម្រិតទាបមួយ។

លោកចៅក្រម Moss បាននិយាយថា លោកនឹងទុកចន្លោះពេល ១៤ថ្ងៃ នៃកាលបរិច្ឆេទធរមានរបស់ដីកាដែលពាក់ព័ន្ធនេះ ដើម្បីអនុញ្ញាតឱ្យរដ្ឋបាលលោក Trump ប្តឹងឧទ្ធរណ៍។ រដ្ឋបាលលោក Trump តែងប៉ះទង្គិចជាមួយចៅក្រមសហព័ន្ធជាញឹកញាប់ចាប់តាំងពីលោក Trump ត្រឡប់ចូលកាន់តំណែងវិញមក ជាពិសេសជាមួយចៅក្រមដែលសម្រេចប្រឆាំងនឹងគោលនយោបាយអន្តោប្រវេសន៍ដ៏តឹងរ៉ឹងរបស់លោក៕