មន្ត្រីអាមេរិក កាលពីថ្ងៃពុធ (ទី២ ខែកក្កដា) បានព្យាយាមនិយាយសម្រាល ពាក់ព័ន្ធនឹងសេចក្តីប្រកាសរបស់សេតវិមាន ដែលថា ទីក្រុងវ៉ាស៊ីនតោន កំពុងផ្អាកការដឹកជញ្ជូនអាវុធមួយចំនួនទៅកាន់អ៊ុយក្រែន ដោយប្រាប់ថា លោកប្រធានាធិបតី Donald Trump នៅតែមានជម្រើស «រឹងមាំ» ក្នុងការផ្ដល់ជំនួយយោធាឲ្យទីក្រុងគីវ។

គួរបញ្ជាក់ថា អ៊ុយក្រែនកំពុងទប់ទល់នឹងការវាយប្រហារដោយមីស៊ីល និងយានដ្រូនដ៏ធំបំផុតរបស់រុស្ស៊ីជាលើកដំបូង ក្នុងសង្គ្រាមរយៈពេល ៣ឆ្នាំ ហេតុនេះ ការបញ្ឈប់ផ្តល់អាវុធនេះ ជាពិសេសសម្រាប់ប្រព័ន្ធការពារដែនអាកាស នឹងក្លាយជាការប៉ះពាល់យ៉ាងធ្ងន់ធ្ងរ ចំពោះទីក្រុងគីវ។

អ្នកនាំពាក្យមន្ទីរបញ្ចកោណ លោក Sean Parnell បានប្រាប់អ្នកសារព័ត៌មានថា៖ «ក្រសួងការពារជាតិបន្តផ្តល់ជម្រើសដ៏រឹងមាំដល់លោកប្រធានាធិបតី ទាក់ទងនឹងជំនួយយោធា សម្រាប់អ៊ុយក្រែន ដែលស្របតាមគោលដៅរបស់លោក ក្នុងការនាំឲ្យសោកនាដកម្មសង្គ្រាមឈានដល់ទីបញ្ចប់»។

លោកបាននិយាយថា៖ «ក្រសួងកំពុងពិនិត្យយ៉ាងម៉ត់ចត់ និងសម្របតាមវិធីសាស្រ្តរបស់ខ្លួន ឆ្ពោះទៅរកការសម្រេចបាននូវគោលបំណងនេះ ខណៈពេលដែលក៏បន្តរក្សាការត្រៀមផ្នែកយោធា និងអាទិភាពការពារជាតិរបស់សហរដ្ឋអាមេរិកផងដែរ»។

ទន្ទឹមនឹងនេះដែរ អ្នកនាំពាក្យក្រសួងការបរទេសអាមេរិក លោកស្រី Tammy Bruce បានប្រាប់អ្នកសារព័ត៌មានថា៖ «នេះមិនមែនជាការបញ្ឈប់របស់ពួកយើង ក្នុងការជួយអ៊ុយក្រែន ឬការផ្តល់អាវុធនោះទេ។ នេះជាព្រឹត្តិការណ៍មួយ និងស្ថានភាពមួយ ហើយយើងនឹងពិភាក្សា អំពីអ្វីផ្សេងទៀត ដែលនឹងកើតឡើងនាពេលអនាគត»៕