កាលពីថ្ងៃពុធ (ទី២ ខែកក្កដា) ប្រទេសបារាំងបានបញ្ជាក់ជាថ្មីនូវការថ្កោលទោស ចំពោះអ៊ីរ៉ង់ ជុំវិញការឃុំខ្លួនពលរដ្ឋបារាំង ២នាក់ ដែលត្រូវបានឃុំឃាំងអស់រយៈពេល ៣ឆ្នាំមកហើយ។

បន្ទាប់ពីមានសេចក្ដីរាយការណ៍ពីសារព័ត៌មាន AFP ដែលថា អ្នកទាំង ២ ត្រូវបានចោទប្រកាន់ពីបទយកការសម្ងាត់ឲ្យទីភ្នាក់ងារចារកម្ម Mossad របស់អ៊ីស្រាអែល ក្រសួងការបរទេសបារាំងបានលើកឡើងនៅក្នុងសេចក្តីថ្លែងការណ៍មួយថា ប្ដីប្រពន្ធ គឺលោកស្រី Cecile Kohler និងប្ដីរបស់លោកស្រី លោក Jacques Paris កំពុងត្រូវបានឃុំខ្លួន «ដោយបំពានទាំងស្រុង»។

ប្រភពការទូតមួយបានបង្ហើបថា ប្រសិនបើសេចក្ដីរាយការណ៍នោះ ត្រូវបានបញ្ជាក់ថា ពិត ការចោទប្រកាន់ គឺ «គ្មានមូលដ្ឋានអ្វីទាំងអស់» ដោយបន្ថែមថា អ្នកទាំង២ គ្មានកំហុសអ្វីឡើយ។

ប្រទេសបារាំងកាលពីខែឧសភា បានប្តឹងទៅតុលាការយុត្តិធម៌អន្តរជាតិ (ICJ) ប្រឆាំងនឹងអ៊ីរ៉ង់ ដោយចោទពីបទរំលោភលើសិទ្ធិទទួលបានការការពារពីកុងស៊ុល ដែលជាប៉ុនប៉ង ដើម្បីដាក់សម្ពាធលើអ៊ីរ៉ង់ ជុំវិញការឃុំខ្លួនលោកស្រី Kohler និងលោក Paris ដែលត្រូវបានចាប់ឃុំតាំងពីខែឧសភា ឆ្នាំ២០២២។

គួរបញ្ជាក់ថា ឆ្មាំបដិវត្តន៍អ៊ីរ៉ង់ បានឃុំខ្លួនជនបរទេស និងអ្នកមានសញ្ជាតិ២ រាប់សិបនាក់ ក្នុងប៉ុន្មានឆ្នាំថ្មីៗនេះ ដែលជារឿយៗត្រូវបានចោទប្រកាន់ទាក់ទងនឹងចារកម្ម។ ក្រុមសិទ្ធិមនុស្ស និងបណ្តាប្រទេសលោកខាងលិច បានចោទប្រកាន់ឬីក្រុងតេអេរ៉ង់ថា បានប្រើប្រាស់អ្នកជាប់ឃុំបរទេសធ្វើជាឧបករណ៍ចរចា ជាការលើកឡើងដែលអ៊ីរ៉ង់បដិសេធ៕