លោក វ្ល៉ូឌីមី ហ្សេឡិនស្គី បាននិយាយនៅលើបណ្តាញ Telegram ថា អ៊ុយក្រែន បានពិភាក្សាអំពីជំនួយយោធាជាមួយសហរដ្ឋអាមេរិក ក្នុងកម្រិតការងារមួយ។

លោកបាននិយាយថា៖«រដ្ឋមន្ត្រីការពារជាតិ និងកិច្ចការបរទេសរបស់អ៊ុយក្រែន កាលពីថ្ងៃពុធ បានផ្តល់របាយការណ៍ រួមទាំងទាក់ទងនឹងសហរដ្ឋអាមេរិក។ នាពេលបច្ចុប្បន្ននេះ ព័ត៌មានលម្អិតនៃការគាំទ្រផ្នែកការពារជាតិ រួមទាំងការការពារដែនអាកាស ឥឡូវនេះ កំពុងត្រូវបានពិភាក្សា ក្នុងកម្រិតការងារ ដោយសហរដ្ឋអាមេរិក និងអ៊ុយក្រែន»។

នៅមុនពេលកិច្ចពិភាក្សា ក្រសួងការពារជាតិអ៊ុយក្រែន បាននិយាយថា ប្រទេសនេះ «មិនត្រូវបានគេជូនដំណឹងជាផ្លូវការអំពីការផ្អាក ឬការត្រួតពិនិត្យកាលវិភាគនៃការផ្តល់ជំនួយយោធា ដែលបានព្រមព្រៀងគ្នាពីមុននោះទេ»។

នាពេលមុននេះ កាសែត The New York Times បានរាយការណ៍ដោយដកស្រង់ប្រភពថា សហរដ្ឋអាមេរិក នឹងផ្អាកការផ្គត់ផ្គង់មីស៊ីលស្ទាក់ចាប់សម្រាប់ប្រព័ន្ធការពារដែនអាកាស Patriot មីស៊ីលវាយប្រហារ គោលដៅជាក់លាក់ GMLRS មីស៊ីលវាយប្រហារគោលដៅ Hellfire ប្រព័ន្ធមីស៊ីលចល័ត Stinger និងអាវុធមួយចំនួនទៀតដល់អ៊ុយក្រែន។ ក្រសួងការបរទេសអ៊ុយក្រែន បានកោះអញ្ជើញភារធារីសហរដ្ឋអាមេរិកនៅក្រុងគីវរួចហើយ ដើម្បីពិភាក្សាអំពីព័ត៌មាននេះ។