បុគ្គលិកប៉មត្រួតពិនិត្យចរាចរណ៍ផ្លូវអាកាសរបស់បារាំង នៅថ្ងៃព្រហស្បតិ៍ (ទី៣ ខែកក្កដា) នេះ បានចាប់ផ្តើមធ្វើកូដកម្មរយៈពេល ២ថ្ងៃ ទាមទារលក្ខខណ្ឌការងារប្រសើរជាងមុន ដោយរំខានដល់ការធ្វើដំណើរតាមផ្លូវអាកាស ខណៈពេលដែលរដូវក្ដៅកំពុងចាប់ផ្ដើម។

ទីភ្នាក់ងារអាកាសចរណ៍ស៊ីវិល DGAC របស់បារាំង បានស្នើឲ្យក្រុមហ៊ុនអាកាសចរណ៍កាត់បន្ថយចំនួនជើងហោះហើរទាំងក្នុង និងក្រៅប្រទេស ក្នុងនោះរួមទាំងនៅអាកាសយានដ្ឋាន Roissy Charles de Gaulle នៅទីក្រុងប៉ារីស ដែលជាកន្លែងដ៏មមាញឹកបំផុតមួយរបស់អឺរ៉ុប ដោយសារកូដកម្មនេះ។

ក្រុមហ៊ុនអាកាសចរណ៍ Air France ដែលជាក្រុមហ៊ុនអាកាសចរណ៍ធំជាងគេរបស់ប្រទេសបារាំង បានឲ្យដឹងថា ខ្លួនបានកែសម្រួលកាលវិភាគហោះហើរ ដោយមិនបានផ្តល់ព័ត៌មានលម្អិត ប៉ុន្តែថា ក្រុមហ៊ុនកំពុងរក្សាជើងហោះហើរផ្លូវឆ្ងាយ។

ក្រុមហ៊ុនអាកាសចរណ៍ Ryanair បានប្រាប់ថា ខ្លួនត្រូវបានបង្ខំឲ្យលុបចោលជើងហោះហើរចំនួន ១៧០វ៉ុល ដែលប៉ះពាល់ដល់អ្នកដំណើរជាង ៣០.០០០នាក់ កាលពីថ្ងៃពុធ (ទី៣ ខែកក្កដា) និងថ្ងៃសុក្រ (ទី៤ ខែកក្កដា)។ ក្រុមហ៊ុនអាកាសចរណ៍របស់ប្រទេសអៀរឡង់មួយនេះ បានឲ្យនៅក្នុងសេចក្តីថ្លែងការណ៍មួយថា៖ «បន្ថែមពីលើជើងហោះហើរទៅ/មកពីប្រទេសបារាំងដែលត្រូវបានលុបចោល កូដកម្មនេះក៏នឹងប៉ះពាល់ដល់ជើងហោះហើររបស់បារាំងទាំងអស់ផងដែរ»។

សហជីពបុគ្គលិកប៉មត្រួតពិនិត្យចរាចរណ៍ផ្លូវអាកាសធំជាងគេទី២ របស់បារាំង គឺ UNSA-ICNA បានបញ្ជាក់ថា សមាជិករបស់សហជីព កំពុងធ្វើកូដកម្ម ជុំវិញកង្វះបុគ្គលិករយៈពេលយូរ ឧបករណ៍ហួសសម័យ និងវប្បធម៌គ្រប់គ្រងដ៏អាក្រក់។ រដ្ឋមន្ត្រីក្រសួងដឹកជញ្ជូន លោក Philippe Tabarot បានចាត់ទុកការទាមទាររបស់សហជីពថា មិនអាចទទួលយកបានឡើយ៕