ប្រទេសចិនបានឲ្យដឹងថា ខ្លួនកំពុងពិនិត្យមើលកិច្ចព្រមព្រៀងពាណិជ្ជកម្មដែលសហរដ្ឋអាមេរិក និងវៀតណាម បានឈានដល់ ហើយនឹងឆ្លើយតបវិញ ប្រសិនបើផលប្រយោជន៍របស់ខ្លួន ត្រូវបានប៉ះពាល់ ដែលជាសញ្ញាបង្ហាញថា ភាពតានតឹង រវាងទីក្រុងប៉េកាំង និងទីក្រុងវ៉ាស៊ីនតោន ប្រឈមនឹងសភាពកាន់តែអាក្រក់ទៅៗ នៅពេលដែលកិច្ចព្រមព្រៀងជាច្រើនទៀតត្រូវបានបញ្ចប់។

អំឡុងសន្និសីទសារព័ត៌មាន នៅទីក្រុងប៉េកាំង នាថ្ងៃព្រហស្បតិ៍ (ទី៣ ខែកក្កដា) នេះ អ្នកនាំពាក្យក្រសួងពាណិជ្ជកម្ម លោកស្រី He Yongqian បានប្រាប់ថា៖ «យើងរីករាយដែលឃើញភាគីទាំងអស់ដោះស្រាយជម្លោះពាណិជ្ជកម្មជាមួយសហរដ្ឋអាមេរិក តាមរយៈការចរចាដោយស្មើភាពគ្នា ប៉ុន្តែប្រឆាំងយ៉ាងម៉ឺងម៉ាត់ចំពោះភាគីណាមួយដែលឈានដល់កិច្ចព្រមព្រៀង ដោយយកប្រៀបលើផលប្រយោជន៍របស់ប្រទេសចិន»។

ដោយមិនបានបញ្ជាក់លម្អិត អំពីវិធានការទាំងនោះ លោកស្រីបានបន្ថែមថា៖ «ប្រសិនបើស្ថានភាពបែបនេះកើតឡើងមែននោះ ប្រទេសចិននឹងតបតវិញយ៉ាងម៉ឺងម៉ាត់ ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន»។

ការអត្ថាធិប្បាយបែបនេះ គឺជាការបញ្ជាក់ឡើងវិញនូវខ្សែបន្ទាត់របស់ប្រទេសចិន ចាប់តាំងពីសហរដ្ឋអាមេរិក បានចាប់ផ្តើមធ្វើការលើកិច្ចព្រមព្រៀងមួយចំនួនជាមួយដៃគូពាណិជ្ជកម្ម ជុំវិញពិភពលោក ដែលមានគោលបំណងកាត់បន្ថយឱនភាពពាណិជ្ជកម្មរបស់អាមេរិក។ ហើយវាក៏កើតឡើងផងដែរបន្ទាប់ពីប្រធានាធិបតីអាមេរិក លោក Donald Trump បាននិយាយថា លោកបានឈានដល់កិច្ចព្រមព្រៀងជាមួយវៀតណាម៕