អ្នកជំនាញអង្គការសហប្រជាជាតិ(UN)នៅថ្ងៃព្រហស្បតិ៍នេះ បានអំពាវនាវឲ្យបណ្តាលរដ្ឋដាក់ទណ្ឌកម្មអាវុធ និងកាត់ផ្តាច់ទំនាក់ទំនងពាណិជ្ជកម្ម និងហិរញ្ញវត្ថុជាមួយអ៊ីស្រាអែល ដែលអ្នកស្រីចោទប្រកាន់ថា អ្នកទទួលខុសត្រូវចំពោះអំពើប្រល័យពូជសាសន៍ដ៏ឃោឃៅបំផុតនៅក្នុងប្រវត្តិសាស្រ្តសម័យទំនើប ។

 នៅក្នុងសុន្ទរកថាទៅកាន់ក្រុមប្រឹក្សាសិទ្ធិមនុស្ស UN អ្នកស្រី Francesca Albanese ដែលជាអ្នករាយការណ៍ពិសេសលើដែនដីកាន់កាប់ប៉ាឡេស្ទីន និយាយថា ស្ថានភាពនៅតំបន់ហ្កាហ្សា គឺមហន្តរាយ ។

 បេសកកម្មការទូតរបស់អ៊ីស្រាអែលនៅទីក្រុងហ្សឺណែវ ពុំបានឆ្លើយតបភ្លាមៗនោះទេចំពោះសំណើសុំសេចក្តីអត្ថាធិប្បាយចំពោះសុន្ទរកថារបស់អ្នកស្រី Albanese ។

 អ៊ីស្រាអែល បានច្រានចោលការចោទប្រកាន់ពីអំពើប្រល័យពូជសាសន៍នៅតំបន់ហ្កាហ្សា ដោយពួកគេលើកឡើងពីសិទ្ធិស្វ័យការពារ បន្ទាប់ពីការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលា ឆ្នាំ ២០២៣ ។

 អ្នកស្រី Albanese ស្ថិតនៅក្នុងចំណោមអ្នកជំនាញឯករាជ្យUN ចងក្រងឯកសារការបំពាននៅជុំវិញពិភពលោក និងបានបញ្ចេញរបាយការណ៍ចុងក្រោយរបស់អ្នកស្រី បង្ហាញឈ្មោះក្រុមហ៊ុនជាង ៦០ដែលអ្នកស្រីនិយាយថា ជាប់ពាក់ព័ន្ធនឹងការគាំទ្រការតាំងលំនៅនិគមន៍អ៊ីស្រាអែល និងសកម្មភាពយោធានៅតំបន់ហ្កាហ្សា ។

 នៅដើមសប្តាហ៍នេះ ក្រុមបេសកកម្មការទូតអ៊ីស្រាអែលនៅទីក្រុងហ្សឺណែវ បាននិយាយថា របាយការណ៍ចុងក្រោយរបស់អ្នកស្រី Albanese គ្មានមូលដ្ឋានផ្នែកច្បាប់ បង្ខូចកេរ្តិ៍ឈ្មោះ និងបំពានការិយាល័យរបស់គាត់ ៕