អ៊ីស្រាអែល៖ នាយករដ្ឋមន្ត្រីអ៊ីស្រាអែលលោក Naftali Bennett បានប្រកាសពីការពង្រីកយុទ្ធនាការចាក់វ៉ាក់សាំងដូសជំរុញលើកទី២ របស់ប្រទេសដល់ប្រជាជនមានអាយុលើសពី ៦០ឆ្នាំដោយសារវាប្រឈមទៅនឹងការកើនឡើងករណីវីរុស COVID-19។ ប្រទេសអ៊ីស្រាអែលកាលពីសប្ដាហ៍មុនបានអនុម័តការចាក់វ៉ាក់សាំងដូសជំរុញ សម្រាប់តែប្រជាជនមានជំងឺជាមូលដ្ឋាន។
ថ្លែងតាមទូរទស្សន៍ជាតិ លោក Bennett បាននិយាយថា ការផ្តល់ឱ្យប្រជាជនអ៊ីស្រាអែលវ័យចំណាស់ នូវការចាក់វ៉ាក់សាំងដូសជំរុញដូសទី៤ នឹងផ្តល់នូវស្រទាប់ថ្មីនៃការការពារវីរុស។ កាលពីថ្ងៃអាទិត្យលោក Bennett បានព្រមានថា ប្រទេសអ៊ីស្រាអែលនឹងមើលឃើញករណីឆ្លងវីរុសរាប់ម៉ឺនករណីក្នុងមួយថ្ងៃ ខណៈវីរុសបម្លែងខ្លួនថ្មី omicron បន្តរាលដាល។ មជ្ឈមណ្ឌលវេជ្ជសាស្ត្រ Sheba របស់អ៊ីស្រាអែលបានចាប់ផ្ដើមផ្តល់វ៉ាក់សាំង COVID-19 លើកទី៤ ដល់អ្នកជំងឺបេះដូងកាលពីថ្ងៃសុក្រ ខណៈដែលអាជ្ញាធរបានអនុម័តចាក់វ៉ាក់សាំងដូសជំរុញ សម្រាប់អ្នកងាយរងគ្រោះបំផុតដោយសារវីរុសនេះ។ អ៊ីស្រាអែលចាប់ផ្តើមការសាកល្បងដូសវ៉ាក់សាំងទី៤ នៅមជ្ឈមណ្ឌលនៅដើមសប្តាហ៍នេះ ដោយផ្តល់ដល់បុគ្គលិកពេទ្យប្រមាណ ១៥០នាក់ដែលបានចាក់វ៉ាក់សាំងដូសជំរុញលើកទី១ ក្នុងខែសីហា។
អ៊ីស្រាអែលគឺជាប្រទេសមួយក្នុងចំណោមប្រទេសដំបូងគេនៅលើពិភពលោក ដែលដាក់ឱ្យប្រើប្រាស់វ៉ាក់សាំងការពារវីរុសឆ្លងរបស់ក្រុមហ៊ុន Pfizer កាលពីមួយឆ្នាំមុន ហើយបានចាប់ផ្ដើមណែនាំការចាក់វ៉ាក់សាំងដូសជំរុញកាលពីរដូវក្តៅមុន។ ប៉ុន្តែប្រទេសនេះនៅតែមើលឃើញរលកនៃការឆ្លង ដែលត្រូវបានដាក់កំហុសលើវីរុសបម្លែងខ្លួនថ្មី Delta ហើយក្រុមមន្ត្រីបានព្រមានអំពីកត្តាមួយផ្សេងទៀត ដែលជំរុញដោយវីរុសបម្លែងខ្លួនថ្មី omicron ដែលរាលដាលឆាប់រហ័ស៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
