ប្រភពស្និទ្ធនឹងក្រុមសកម្មប្រយុទ្ធមួយនេះបាននិយាយកាលពីថ្ងៃព្រហស្បតិ៍ (០៣ កក្កដា) ថា ក្រុមហាម៉ាស កំពុងស្វះស្វែងរកការធានាថា សំណើបទឈប់បាញ់ថ្មីដែលគាំទ្រដោយសហរដ្ឋអាមេរិកសម្រាប់តំបន់ហ្កាហ្សា នឹងនាំទៅដល់ការបញ្ចប់សង្គ្រាមជាអចិន្រ្តៃយ៍ ខណៈដែលក្រុមគ្រូពេទ្យបាននិយាយថា ការវាយប្រហាររបស់អ៊ីស្រាអែល នៅទូទាំងទឹកដីប៉ាឡេស្ទីនដ៏តូចចង្អៀតមួយនេះ បានបន្តសម្លាប់មនុស្សរាប់សិបនាក់។

ក្រុមមន្ត្រីអ៊ីស្រាអែលនិយាយថា ក្ដីរំពឹងសម្រាប់ការឈានដល់កិច្ចព្រមព្រៀងបទឈប់បាញ់ និងចំណាប់ថ្នូរបានលេចចេញជារូបរាងកាន់តែច្បាស់ហើយ រយៈពេលជិត ២១ខែ ចាប់តាំងពីសង្រ្គាមរវាងអ៊ីស្រាអែល និងក្រុមហាម៉ាស បានផ្ទុះឡើង។ កាលថ្ងៃអង្គារសប្ដាហ៍នេះ ប្រធានាធិបតីអាមេរិក លោក Donald Trump និយាយថា អ៊ីស្រាអែលបានទទួលយកលក្ខខណ្ឌចាំបាច់ដើម្បីបញ្ចប់បទឈប់បាញ់រយៈពេល ៦០ថ្ងៃជាមួយក្រុមហាម៉ាសហើយ ហើយអំឡុងពេលនោះភាគីនានានឹងធ្វើការដើម្បីបញ្ចប់សង្គ្រាម។

ប្រភពជិតស្និទ្ធនឹងក្រុមនេះបាននិយាយថា ក្រុមហាម៉ាស ចង់បានការធានាឱ្យច្បាស់លាស់ថាបទឈប់បាញ់នោះនឹងនាំទៅដល់ការបញ្ចប់សង្គ្រាមពិតប្រាកដ ខណៈមន្ត្រីអ៊ីស្រាអែលពីររូបនិយាយថា ចំណុចខ្លឹមសារលម្អិតទាំងនោះមិនទាន់សម្រេចចុងក្រោយនៅឡើយទេ។

នៅក្នុងសេចក្តីថ្លែងការណ៍មួយនៅព្រឹកព្រលឹមថ្ងៃសុក្រ (០៤ កក្កដា) នេះ ក្រុមហាម៉ាស និយាយថា ខ្លួនកំពុងពិភាក្សាលើសំណើបទឈប់បាញ់ជាមួយក្រុមបក្សពួកប៉ាឡេស្ទីនផ្សេងទៀត ហើយនឹងបញ្ជូនការឆ្លើយតបរបស់ខ្លួនទៅកាន់អ្នកសម្រុះសម្រួលនៅពេលដែលកិច្ចពិភាក្សាទាំងនោះបានបញ្ចប់៕