ក្រសួងរតនាគារសហរដ្ឋអាមេរិក បាននិយាយថា កាលពីថ្ងៃព្រហស្បតិ៍ (០៣ កក្កដា) ទីក្រុងវ៉ាស៊ីនតោនបានដាក់ទណ្ឌកម្មថ្មីៗបន្ថែមទៀតប្រឆាំងនឹងបណ្តាញអង្គភាព ដែលរត់ពន្ធប្រេងអ៊ីរ៉ង់ ក្លែងជាប្រេងអ៊ីរ៉ាក់ និងទៅលើស្ថាប័នហិរញ្ញវត្ថុ ដែលគ្រប់គ្រងដោយក្រុមសកម្មប្រយុទ្ធហេសបូឡា របស់លីបង់។

ក្រសួងរតនាគារលើកឡើងថា បណ្តាញក្រុមហ៊ុនដែលគ្រប់គ្រងដោយជនជាតិអ៊ីរ៉ាក់-អង់គ្លេស ឈ្មោះ Salim Ahmed Said បាននឹងកំពុងទិញ និងដឹកជញ្ជូនប្រេងអ៊ីរ៉ង់ ក្នុងតម្លៃរាប់ពាន់លានដុល្លារ ដែលក្លែងធ្វើជា ឬលាយជាមួយនឹងប្រេងអ៊ីរ៉ាក់ ចាប់តាំងពីយ៉ាងហោចណាស់ឆ្នាំ២០២០ មក។

រដ្ឋមន្រ្តីក្រសួងរតនាគារ លោក Scott Bessent បាននិយាយថា "អាមេរិកនឹងបន្តកំណត់គោលដៅលើប្រភពចំណូលរបស់ទីក្រុងតេអេរ៉ង់ និងបង្កើនសម្ពាធសេដ្ឋកិច្ចកាន់តែធ្ងន់ដើម្បីរំខានដល់ការចូលប្រើប្រាស់ធនធានហិរញ្ញវត្ថុរបស់របបនេះ ដែលជំរុញសកម្មភាពអស្ថិរភាពរបស់ខ្លួន"។

គួរឱ្យដឹងថា សហរដ្ឋអាមេរិក បានដាក់ទណ្ឌកម្មជាច្រើនលើការនាំចេញប្រេងរបស់អ៊ីរ៉ង់ ជុំវិញកម្មវិធីនុយក្លេអ៊ែររបស់ខ្លួន និងការផ្តល់មូលនិធិដល់ក្រុមសកម្មប្រយុទ្ធនៅទូទាំងមជ្ឈិមបូព៌ា។ សារព័ត៌មានរ៉យទ័របានរាយការណ៍កាលពីចុងឆ្នាំមុនថា បណ្តាញរត់ពន្ធប្រេងដែលបង្កើតបានយ៉ាងហោច ១ពាន់លានដុល្លារក្នុងមួយឆ្នាំឱ្យអ៊ីរ៉ង់ និងភ្នាក់ងាររបស់ខ្លួន បានរីកលូតលាស់នៅអ៊ីរ៉ាក់ ចាប់តាំងពីឆ្នាំ២០២២មក៕