រុស្ស៊ី បាននិយាយកាលពីថ្ងៃព្រហស្បតិ៍ទី៣ ខែកក្កដា ថា ខ្លួនបានទទួលយកសារតាំងរបស់ឯកអគ្គរដ្ឋទូតថ្មីប្រទេសអាហ្វហ្គានីស្ថាន ដែលធ្វើឱ្យរុស្សីក្លាយជាប្រទេសដំបូងគេដែលទទួលស្គាល់រដ្ឋាភិបាលតាលីបង់របស់ប្រទេសនេះ។ នៅក្នុងសេចក្តីថ្លែងការណ៍ ក្រសួងការបរទេសរុស្ស៊ីបាននិយាយថា ទីក្រុងមូស្គូ បានមើលឃើញនូវទស្សនវិស័យល្អៗក្នុងការអភិវឌ្ឍទំនាក់ទំនង ហើយនឹងបន្តគាំទ្រទីក្រុងកាប៊ុលក្នុងផ្នែកសន្តិសុខ ការប្រឆាំងភេរវកម្ម និងការប្រយុទ្ធប្រឆាំងឧក្រិដ្ឋកម្មគ្រឿងញៀន។

រុស្ស៊ីក៏បានឃើញឱកាសពាណិជ្ជកម្ម និងសេដ្ឋកិច្ចសំខាន់ៗផងដែរ ជាពិសេសក្នុងវិស័យថាមពល ការដឹកជញ្ជូន កសិកម្ម និងហេដ្ឋារចនាសម្ព័ន្ធ។ រដ្ឋមន្ត្រីការបរទេសអាហ្វហ្គានីស្ថាន លោក Amir Khan Muttaqi បាននិយាយថាលោក «បានវាយតម្លៃលើជំហានដ៏មុះមុតដែលបានធ្វើឡើងដោយរុស្ស៊ី»។

គ្មានប្រទេសណាផ្សេងទៀតដែលបានទទួលស្គាល់ជាផ្លូវការរដ្ឋាភិបាលតាលីបង់ទេ ដែលបានដណ្តើមអំណាចកាលពីខែសីហា ឆ្នាំ២០២១ ខណៈកងកម្លាំងដឹកនាំដោយសហរដ្ឋអាមេរិក បានចាប់ផ្តើមការដកកងទ័ពចេញពីប្រទេសអាហ្វហ្គានីស្ថានដ៏ច្របូកច្របល់ក្រោយសង្គ្រាមរយៈពេល២០ឆ្នាំ។ ទោះជាយ៉ាងណា ប្រទេសចិន អារ៉ាប់រួម អ៊ូសបេគីស្ថាន និងប៉ាគីស្ថាន ប្រទេសទាំងនេះបានចាត់តាំងឯកអគ្គរដ្ឋទូតប្រចាំទីក្រុងកាប៊ុល ក្នុងជំហានឆ្ពោះទៅរកការទទួលស្គាល់។

ចំណាត់ការរបស់រុស្ស៊ី បង្ហាញពីព្រឹត្តិការណ៍ដ៏សំខាន់មួយសម្រាប់រដ្ឋបាលក្រុមតាលីបង់ ខណៈខ្លួនព្យាយាមបន្ធូរបន្ថយភាពឯកោពីអន្តរជាតិ។

វាទំនងជាត្រូវបានតាមដានយ៉ាងដិតដល់ពីសំណាក់ទីក្រុងវ៉ាស៊ីនតោន ដែលបានបង្កកទ្រព្យសម្បត្តិធនាគារកណ្តាលរបស់ប្រទេសអាហ្វហ្គានីស្ថានរាប់ពាន់លាន និងបានអនុវត្តទណ្ឌកម្មលើមេដឹកនាំជាន់ខ្ពស់មួយចំនួននៅក្នុងក្រុមតាលីបង់ ដែលបានរួមចំណែកធ្វើឱ្យវិស័យធនាគាររបស់ប្រទេសអាហ្វហ្គានីស្ថាន ត្រូវបានកាត់ផ្តាច់ពីប្រព័ន្ធហិរញ្ញវត្ថុអន្តរជាតិ។