នៅក្នុងផ្ទះសំណាក់មួយក្នុងរដ្ឋធានីរបស់ប្រទេសប៉ាគីស្ថាន នាង Kimia វ័យ២៥ឆ្នាំ ចំណាយពេលច្រើនថ្ងៃរបស់នាងដើម្បីគូររូបស្ត្រី។ នាង Kimia គឺជាវិចិត្រករនិងជាអ្នកតស៊ូមតិសិទ្ធិស្ត្រី ដែលបានភៀសខ្លួនចេញពីប្រទេសអាហ្វហ្គានីស្ថានក្នុងឆ្នាំ២០២៤ បន្ទាប់ពីត្រូវបានទទួលយកក្នុងកម្មវិធីឲ្យចូលផ្នែកមនុស្សធម៌របស់ប្រទេសអាល្លឺម៉ង់សម្រាប់ជនជាតិអាហ្វហ្គានីស្ថានដែលត្រូវបានចាត់ទុកថាមានហានិភ័យនៅក្រោមរបបក្រុមតាលីបង់។

កម្មវិធីឲ្យចូលផ្នែកមនុស្សធម៌របស់ប្រទេសអាល្លឺម៉ង់ បានចាប់ផ្តើមនៅខែតុលា ឆ្នាំ២០២២។ កម្មវិធីនេះមានបំណងទទួលយកជនជាតិអាហ្វហ្គានីស្ថានរហូតដល់១.០០០នាក់ក្នុងមួយខែ ដែលត្រូវបានគេចាត់ទុកថាមានហានិភ័យ ដោយសារតែការងាររបស់ជនជាតិអាហ្វហ្គានីស្ថានទាំងនេះនៅក្នុងផ្នែកសិទ្ធិមនុស្ស យុត្តិធម៌ នយោបាយ ឬការអប់រំ។

ប៉ុន្តែជនជាតិអាហ្វហ្គានីស្ថានតិចជាង១.៦០០នាក់ បានទៅដល់ក្នុងរយៈពេលជាង២ឆ្នាំដោយសារតែការផ្អាក និងការលុបចោលជើងហោះហើរ។ បន្ទាប់ពីការបោះឆ្នោតក្នុងខែកុម្ភៈ ឆ្នាំ២០២៥ ការផ្លាស់ប្តូររដ្ឋាភិបាលបាននាំឱ្យមានការផ្អាកកម្មវិធីឲ្យចូលផ្នែកមនុស្សធម៌របស់ប្រទេសអាល្លឺម៉ង់ជាបន្តបន្ទាប់ ហើយបច្ចុប្បន្ននេះ ក្រុមចម្រុះស្តាំនិយមកណ្តាលថ្មី មានបំណងបិទកម្មវិធីនេះតែម្តង។

យោងតាមក្រសួងការបរទេសបានឲ្យដឹងថា ជនជាតិអាហ្វហ្គានីស្ថានប្រហែល ២.៤០០ នាក់កំពុងរង់ចាំធ្វើដំណើរទៅកាន់ប្រទេសអាល្លឺម៉ង់។ ខណៈក្រសួងនិយាយថា រដ្ឋាភិបាលនឹងយកចិត្តទុកដាក់ និងផ្តល់កន្លែងស្នាក់នៅដល់អ្នកដែលមានរួចហើយនៅក្នុងកម្មវិធីនេះ ប៉ុន្តែក្រសួងពុំបានឆ្លើយសំណួររបស់សារព័ត៌មាន Reuters អំពីចំនួនអ្នកសម្ភាសន៍ដែលត្រូវបានលុបចោលវិញ ឬរយៈពេលដែលការផ្អាកនេះនឹងមានរយៈពេលយូរប៉ុន្មាននោះទេ។