​បាល់ទាត់៖ ​ក្លិប​ Newcastle United បាន​ចាប់ផ្តើម​ដាក់​សំណើ​ទិញ​ខ្សែ​ការពារ​ស្លាប​ស្ដាំ​អង់គ្លេស Kieran Trippier ពី​ក្លិប​អេ​ស្ប៉ា​ញ Atletico Madrid ដែល​អាច​ជា​កីឡាករ​ថ្មី​ទី១ ​ក្រោម​ការដឹកនាំ​របស់​លោក Eddie Howe​។ ​​កីឡាករ​វ័យ ៣១ឆ្នាំ​រូប​នេះ​បាន​បង្ហាញ​ខ្លួន​សរុប​ឱ្យ Atletico Madrid ៨៣ប្រកួត​តាំងពី​ផ្លាស់​ពី Tottenham Hotspur នៅ​ឆ្នាំ២០១៩ ក្នុង​តម្លៃ ២០លាន​ផោន​។

​លោក Eddie Howe ធ្លាប់​ធ្វើការ​ជាមួយ Trippier ជំនាន់​លោក​នៅ​ដឹកនាំ Burnley ដោយ​ចុះហត្ថលេខា​នាំ​យក Trippier ពី Manchester City កាលពី​ឆ្នាំ២០១២ បន្ទាប់ពី​ចំណាយ​ពេល​ក្នុង​លក្ខខណ្ឌ​ខ្ចី​។​ ​អ្នកចាត់ការ Atletico Madrid លោក Diego Simeone ក៏បាន​បញ្ជាក់​ក្នុង​សន្និសីទ​សារព័ត៌មាន​កាលពី​ថ្ងៃ​សៅរ៍​ដែរ​ថា Trippier ផ្លាស់​ទៅកាន់​ទឹកដី​អង់គ្លេស​គឺ​អាស្រ័យ​លើ​រូបគេ​ផ្ទាល់ បន្ទាប់ពី​កីឡាករ​វ័យ ៣១ឆ្នាំ​រូប​នេះ​ធ្លាប់​លើក​ឡើង​ថា ​ចង់​ត្រលប់​ទៅកាន់​ទឹកដី​កំណើត​របស់​ខ្លួន​វិញ​ដែរ​។

​​រំលឹក​ថា Kieran Trippier ធ្លាប់​ត្រូវ​បាន​ចរចា​ផ្ទេរ​មកកាន់​ទឹកដី​អង់គ្លេស​វិញ​ កាលពី​រដូវ​កាល​មុន​ដោយ​ក្លិប​ពីរ​គឺ Manchester United និង Arsenal តែ Atletico Madrid ទាមទារ​ដល់ ៥១លាន​ផោន​។ ​Kieran Trippier ដែល​ជា​សមាជិក​របស់​ក្រុម​អង់គ្លេស​ឡើង​វគ្គ​ផ្តាច់ព្រ័ត្រ Euro ២០២០ កន្លងទៅ​គឺជា​សមាជិក​សំខាន់​របស់ Altetico Madrid ដែល​ឈ្នះ​ពាន La Liga រដូវ​កាល​មុន​។ ​Newcastle បច្ចុប្បន្ន​កំពុង​ឈរ​លេខ ១៩ ក្នុង​តារាង​នៅ​ក្រប​ខណ្ឌ English Premier League៕

​អត្ថបទ​៖​នាង សុភា​វុ​ធ