រដ្ឋាភិបាលប្រទេសកុងហ្គោ និងក្រុមឧទ្ទាមដែលគាំទ្រដោយប្រទេសរ៉្វាន់ដា បាននិយាយកាលពីថ្ងៃព្រហស្បតិ៍ ទី៣ ខែកក្កដាថា ភាគីទាំងពីរនឹងបញ្ជូនគណៈប្រតិភូត្រឡប់ទៅប្រទេសកាតាវិញសម្រាប់កិច្ចចរចាសន្តិភាព ខណៈទីក្រុងវ៉ាស៊ីនតោន ជំរុញឱ្យបញ្ចប់ការប្រយុទ្ធគ្នាដែលអាចជួយដោះស្រាយការវិនិយោគរ៉ែដែលមានទឹកប្រាក់រាប់ពាន់លានដុល្លារ។

ក្រុមឧទ្ទាមM23 បានចូលកាន់កាប់ទឹកដីច្រើនជាងពេលណាៗទាំងអស់ នៅភាគខាងកើតប្រទេសកុងហ្គោ បន្ទាប់ពីបានរុលចូលលឿនដូចផ្លេកបន្ទោលកាលពីដើមឆ្នាំនេះ។ ការប្រយុទ្ធគ្នា ដែលការផ្ទុះឡើងចុងក្រោយនៅក្នុងជម្លោះបីទសវត្សរ៍កន្លងទៅនេះ បានសម្លាប់មនុស្សរាប់ពាន់នាក់ និងបានធ្វើឲ្យមនុស្សរាប់សែននាក់ភៀសខ្លួន។

រដ្ឋបាលរបស់លោកប្រធានាធិបតីអាមេរិក Donald Trump កំពុងព្យាយាមសម្របសម្រួលកិច្ចព្រមព្រៀងសន្តិភាពរវាងប្រទេសរ៉្វាន់ដា និងកុងហ្គោ ដែលនឹងនាំមកនូវការវិនិយោគក្នុងទឹកប្រាក់រាប់ពាន់លានដុល្លាររបស់លោកខាងលិចទៅកាន់តំបន់ដែលសម្បូរទៅដោយសារធាតុរ៉ែ។

ប្រទេសកាតា កំពុងរៀបចំកិច្ចប្រឹងប្រែងសម្របសម្រួលដាច់ដោយឡែក ជាមួយគណៈប្រតិភូមកពីរដ្ឋាភិបាលសាធារណរដ្ឋប្រជាធិបតេយ្យកុងហ្គោ និងក្រុមឧទ្ទាម M23 ។