សត្រូវពុំមែនជាប្រទេសកូឡុំប៊ីទេ នេះជាការឆ្លើយតបរបស់ប្រធានាធិបតីប្រទេសកូឡុំប៊ី លោក Gustavo Petro កាលពីថ្ងៃព្រហស្បតិ៍ បន្ទាប់ពីសហរដ្ឋអាមេរិកបានកោះហៅត្រឡប់ទៅវិញអ្នកការទូតជាន់ខ្ពស់របស់ខ្លួនពីស្ថានទូតអាមេរិកក្នុងទីក្រុងបូហ្គោតា ប្រទេសកូឡំប៊ី។

ក្រសួងការបរទេសសហរដ្ឋអាមេរិក បាននិយាយកាលពីថ្ងៃព្រហស្បតិ៍ថា តាមដែលចោទប្រកាន់ វាហួសពីសេចក្តីថ្លែងការណ៍ដែលបានធ្វើឡើងក្នុងកម្រិតខ្ពស់របស់រដ្ឋាភិបាលប្រទេសកូឡុំប៊ី ដែលបានជំរុញឱ្យប្រទេសអាមេរិកខាងត្បូងមួយនេះ កោះហៅឯកអគ្គរដ្ឋទូតរបស់ខ្លួនប្រចាំនៅសហរដ្ឋអាមេរិកត្រឡប់ទៅវិញ។

អ្នកនាំពាក្យក្រសួងការបរទេសអាមេរិក លោកស្រី Tammy Bruce បាននិយាយនៅក្នុងសេចក្តីថ្លែងការណ៍ថា រដ្ឋបាលរបស់លោកប្រធានាធិបតី Donald Trump បានកោះហៅត្រឡប់ទៅវិញភារធារីទទួលបន្ទុកបណ្តោះអាសន្ន លោក John McNamara «សម្រាប់ការពិគ្រោះយោបល់បន្ទាន់ បន្ទាប់ពីមានសេចក្តីថ្លែងការណ៍គ្មានមូលដ្ឋាន និងមានកំហុសឆ្គងក្នុងកម្រិតខ្ពស់បំផុតរបស់រដ្ឋាភិបាលប្រទេសកូឡុំប៊ី។

បន្ថែមលើការកោះហៅទៅវិញនៃភារធារី សហរដ្ឋអាមេរិកកំពុងបន្តវិធានការណ៍ផ្សេងទៀត ដើម្បីបញ្ជាក់យ៉ាងច្បាស់អំពីការព្រួយបារម្ភយ៉ាងខ្លាំងចំពោះស្ថានភាពបច្ចុប្បន្ននៃទំនាក់ទំនងទ្វេភាគីរបស់ប្រទេសទាំងពីរ។

កាលពីខែមករា លោក Trump និង លោក Petro បានប៉ះទង្គិចពាក្យសម្តីគ្នាជុំវិញការបដិសេធរបស់ប្រទេសកូឡុំប៊ី ក្នុងការទទួលយកយន្តហោះយោធាដឹកជនអន្តោប្រវេសន៍ដែលត្រូវបាននិរទេស ជំរុញឱ្យ លោក Trump គំរាមដំឡើងពន្ធនិងដាក់ទណ្ឌកម្ម។ ប៉ុន្តែប្រទេសទាំងពីរអាចដកខ្លួនថយពីមាត់ជ្រោះនៃសង្គ្រាមពាណិជ្ជកម្ម និងបានទម្លាយភាពទាល់ច្រក។