​អាមេរិក៖ អ្នក​ជំនាញ​ខាង​ជំងឺឆ្លង​ជាន់ខ្ពស់​របស់​សហរដ្ឋ​អាមេរិកលោក Anthony Fauci បាន​និយាយថា វា​នៅតែមាន​គ្រោះថ្នាក់​នៃ​ការកើនឡើង​ចំនួន​អ្នកជំងឺ​ចូល​សម្រាក​ព្យាបាល​នៅ​មន្ទីរពេទ្យ​ ដោយសារតែ​ករណីឆ្លង​វីរុស​កូ​រ៉ូ​ណា​ដ៏​ច្រើន ទោះបីជា​ទិន្នន័យ​ដំបូង​បង្ហាញថា វីរុស ​COVID-19 ប​ម្លែ​ង​ខ្លួន​ថ្មី Omicron មិនសូវ​ធ្ងន់ធ្ងរ​ក៏ដោយ​។

​លោក ​Fauci​ បាន​និយាយ​នៅក្នុង​បទសម្ភាសន៍​មួយ​កាលពី​ថ្ងៃអាទិត្យ​ជាមួយ CNN ថា​ ការលំបាក​តែមួយគត់​គឺថា​ ប្រសិនបើ​អ្នកមានករណី​ឆ្លង​ច្រើន ទោះបីជា​អត្រា​នៃ​ការចូល​សម្រាក​ព្យាបាល​នៅ​មន្ទីរពេទ្យ ដោយសារ​ការឆ្លង​វីរុស​ប​ម្លែ​ង​ខ្លួន​ថ្មី Omicron ទាប​ជាងវីរុស​ប​ម្លែ​ង​ខ្លួន​ថ្មី Delta ក៏ដោយក៏​នៅតែមានគ្រោះថ្នាក់​ ដែល​នឹង​មានការ​កើនឡើង​ចំនួន​អ្នក​ចូល​សម្រាក​ព្យាបាល​នៅ​មន្ទីរពេទ្យ ដែល​អាចដាក់​បន្ទុក​ធ្ងន់​លើ​ប្រព័ន្ធ​ថែទាំ​សុខភាព។ ​យោងតាម​ទិន្នន័យ​ពី​មជ្ឈមណ្ឌល​គ្រប់គ្រង និង​បង្ការ​ជំងឺ​សហរដ្ឋអាមេរិក (CDC) វីរុស​ប​ម្លែ​ង​ខ្លួន​ថ្មី Omicron ត្រូវបាន​គេ​ប៉ាន់ប្រមាណ​ថា​ មាន​ចំនួន ៥៨.៦% នៃ​វីរុស​កូ​រ៉ូ​ណាប​ម្លែ​ង​ខ្លួន​ថ្មី​នានា ដែល​កំពុង​ចរាចរ​នៅក្នុង​សហរដ្ឋអាមេរិក​គិត​ត្រឹម​ថ្ងៃទី២៥ ខែធ្នូ។

​ការមកដល់​ភ្លាមៗ​នៃ​វត្តមាន​របស់​វីរុស​ប​ម្លែ​ង​ខ្លួន​ថ្មី ​Omicron បាន​នាំ​ឲ្យ​មានការ​បង្កើត​កំណត់ត្រា​ករណី​ឆ្លង​ក្នុងប្រទេស​នានា​ជុំវិញ​ពិភព​លោក និង​បង្ខំ​ឲ្យ​កាត់បន្ថយ និង​លុបចោល​សកម្មភាព​ពិធីបុណ្យ​ចូលឆ្នាំថ្មីនៅ​ជុំវិញ​ពិភពលោក​។ ក្រុមមន្ត្រី​សហរដ្ឋអាមេរិកបាន​កត់ត្រា​ករណី​ឆ្លង​ថ្មី​នៃ​វីរុស​កូ​រ៉ូ​ណាយ៉ាងហោចណាស់ ៣៤៦,៨៦៩នាក់កាលពី​ថ្ងៃ​សៅរ៍ នេះ​បើ​យោងតាម​សារព័ត៌មាន Reuters។ ​យោងតាម​សារព័ត៌មាន ​Worldometer គិត​ត្រឹម​ព្រឹក​ថ្ងៃ​ចន្ទ​នេះ សហរដ្ឋអាមេរិកមាន​ករណី​ឆ្លង​វីរុស​ COVID-19 សរុប​ចំនួន ៥៦,១៤២,១៧៥នាក់ និងស្លាប់ ៨៤៧,៤០៨នាក់​៕

អត្ថបទ៖ សុខមាន