អង្គការលើកលែងទោសអន្តរជាតិ(Amnesty International)កាលពីថ្ងៃព្រហស្បតិ៍ បានអំពាវនាវឲ្យមាន ការស៊ើបអង្កេតឯករាជ្យលើការចោទប្រកាន់ថា កងកម្លាំងសន្តិសុខរបស់ប្រទេសតូហ្គោ បានសម្លាប់ ធ្វើទារុណកម្ម និងចាប់ពង្រត់មនុស្ស នៅក្នុងការបង្រ្កាបដោយហិង្សាទៅលើការតវ៉ាប្រឆាំងរដ្ឋាភិបាល កាលពីខែមុន។

ដោយត្រូវបានគ្រប់គ្រងអស់រយៈពេល ៥៨ឆ្នាំ ដោយមេដឹកនាំលោក Faure Gnassingbe និងឪពុករបស់ខ្លួន ប្រទេសតូហ្គោ ត្រូវបានរង្គោះរង្គើ ក្នុងប៉ុន្មានសប្តាហ៍ថ្មីៗនេះ ដោយការតវ៉ាដ៏កម្រ នៅក្នុងរដ្ឋធានី Lome ប្រឆាំងនឹងការដំឡើងថ្លៃអគ្គិសនី ការចាប់ខ្លួនអ្នករិះគន់រដ្ឋាភិបាល និងកំណែទម្រង់រដ្ឋធម្មនុញ្ញដែលពង្រឹងការក្តោបក្តាប់អំណាចរបស់លោក Gnassingbe ។

យោងតាមក្រុមសង្គមស៊ីវិលបានឲ្យដឹងថា យ៉ាងហោចណាស់មនុស្ស ៧នាក់ បានស្លាប់ រាប់សិបនាក់ រងរបួស និងជាង ៦០នាក់ ត្រូវបានចាប់ខ្លួន។

អង្គការលើកលែងទោសអន្តរជាតិ បាននិយាយថា ខ្លួនបានសម្ភាសន៍ជនរងគ្រោះ និងសាក្សីដែលបានពិពណ៌នាអំពីការរំលោភបំពានជាបន្តបន្ទាប់ដោយកងកម្លាំងសន្តិសុខ នៅកន្លែងតវ៉ាដែលត្រូវបានហាមឃាត់ កាលពីចុងខែមិថុនា។

លោក Marceau Sivieude នាយកបណ្ដោះអាសន្នរបស់ក្រុមសិទ្ធិមនុស្សសម្រាប់អាហ្វ្រិកភាគខាងលិច និងកណ្តាល បាននិយាយថា យោងតាមសាក្សី «ក្រុមបុរសដែលត្រូវបានគេកំណត់អត្តសញ្ញាណថា ជាកងកម្លាំងសន្តិសុខ ដែលបានធ្វើការសម្លាប់មនុស្សដោយខុសច្បាប់ ការចាប់ខ្លួននិងការឃុំឃាំងដោយបំពាន អំពើទារុណកម្ម និងការធ្វើទុក្ខបុកម្នេញផ្សេងទៀត និងការចាប់ពង្រត់មនុស្សជាច្រើនករណី»។