ក្រុមសកម្មប្រយុទ្ធឃឺដ ដែលបានធ្វើសកម្មភាពបះបោរដ៏រ៉ាំរ៉ៃ នៅក្នុងប្រទេសទួរគី បានប្រកាសកាលពីថ្ងៃព្រហស្បតិ៍ថា ក្រុមយុទ្ធជនរបស់ខ្លួននៅភាគខាងជើងប្រទេសអ៊ីរ៉ាក់ នឹងចាប់ផ្តើមប្រគល់អាវុធរបស់ពួកគេ ដែលជាជំហានជាក់ស្តែងដំបូងឆ្ពោះទៅរកការរំសាយអាវុធ ជាផ្នែកនៃដំណើរការសន្តិភាព។

គណបក្សពលករឃើដ ឬ PKK បានប្រកាសកាលពីខែឧសភាថា ខ្លួននឹងរំសាយ និងបោះបង់ជម្លោះប្រដាប់អាវុធ ដោយបញ្ចប់អរិភាពរយៈពេល ៤ទសវត្សរ៍។ ការសម្រេចនេះ បានធ្វើឡើង បន្ទាប់ពីមេដឹកនាំ PKK លោក Abdullah Ocalan ដែលត្រូវបានជាប់ពន្ធនាគារ នៅលើកោះមួយ នៅជិតទីក្រុងអ៊ីស្តង់ប៊ុល ចាប់តាំងពីឆ្នាំ ១៩៩៩ បានជំរុញឲ្យក្រុមរបស់លោក នៅក្នុងខែកុម្ភៈ ដើម្បីរៀបចំសមាជមួយ ហើយរំសាយអាវុធជាផ្លូវការ។

លោក Ocalan មានអាយុ ៧៦ឆ្នាំ នៅតែបន្តមានឥទ្ធិពលយ៉ាងសំខាន់ នៅក្នុងចលនាឃើដ ទោះបីជា   លោកជាប់ពន្ធនាគារ ២៥ឆ្នាំ ក៏ដោយ។ ការអំពាវនាវរបស់លោក ឲ្យបញ្ចប់ការប្រយុទ្ធគ្នា គឺជំហានដ៏សំខាន់មួយ ឆ្ពោះទៅរកការបញ្ចប់ជម្លោះដ៏រ៉ាំរ៉ៃ ដែលបានឆក់យកជីវិតមនុស្សរាប់ម៉ឺននាក់ ចាប់តាំងពីទសវត្សរ៍ឆ្នាំ ១៩៨០។

គណបក្សពលករឃើដ បាននិយាយនៅក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ថា នៅក្នុងការវិ   វឌ្ឍចុងក្រោយនេះ ក្រុមអ្នកប្រយុទ្ធទ័ពព្រៃមួយក្រុម នឹងចុះមកពីលើភ្នំ ហើយនឹងប្រគល់អាវុធរបស់ពួកគេក្នុងកិច្ចខិតខំប្រឹងប្រែង ដើម្បីប្រកាសពីឆន្ទៈរបស់ពួកគេដើម្បីសន្តិភាព និងនយោបាយប្រជាធិប   តេយ្យ» ។

ពិធីនេះត្រូវបានគេរំពឹងថា នឹងធ្វើឡើងចន្លោះពីថ្ងៃទី ១០ ដល់ថ្ងៃទី ១២ ខែកក្កដា នៅទីក្រុង Sulaymaniyah នៃតំបន់ពាក់កណ្តាលស្វយ័តឃើដរបស់អ៊ីរ៉ាក់ នឹងជាការឈានទៅរកការរំសាយអាវុធជាក់ស្តែងលើកដំបូង។