កងទ័ពប៉ាគីស្ថានបាននិយាយកាលពីថ្ងៃសុក្រនេះថា ខ្លួនបានសម្លាប់ក្រុមសកម្មប្រយុទ្ធចំនួន ៣០នាក់ ដែលប៉ុនប៉ងឆ្លងព្រំដែនចូលមកពីប្រទេសអាហ្វហ្គានីស្ថាន ក្នុងរយៈពេលបីថ្ងៃចុងក្រោយនេះ បន្ទាប់ពីទាហាន ១៦នាក់ បានស្លាប់ ក្នុងការវាយប្រហារអត្តឃាតនៅតំបន់ព្រំដែនដូចគ្នា កាលពីសប្តាហ៍មុន។

យោធាបាននិយាយនៅក្នុងសេចក្តីថ្លែងការណ៍មួយថា ក្រុមសកម្មប្រយុទ្ធជាកម្មសិទ្ធិរបស់ក្រុមតាលីបង់ប៉ាគីស្ថាន ឬក្រុមដែលជាប់ពាក់ព័ន្ធរបស់ពួកគេ ដោយចោទប្រកាន់ថា ឥណ្ឌាដែលជាសត្រូវ គាំទ្រពួកគេ។

យោធាបានបញ្ជាក់ថា៖«កងកម្លាំងសន្តិសុខបានបង្ហាញពីជំនាញវិជ្ជាជីវៈពិសេស ការត្រៀមលក្ខណៈប្រុងប្រយ័ត្ន និងការពារគ្រោះមហន្តរាយ ដែលអាចកើតមានឡើង»។

សេចក្តីថ្លែងការណ៍ បានបន្ថែមថា៖« អាវុធជាច្រើន គ្រាប់រំសេវ និងគ្រឿងផ្ទុះមួយចំនួនធំ ក៏ត្រូវបានរកឃើញដែរ»។

ការសម្លាប់នេះ បានកើតឡើងនៅក្នុងស្រុកព្រំដែននៃខេត្ត North Waziristan ដែលកាលពីសប្តាហ៍មុនទាហានប៉ាគីស្ថាន ១៦នាក់ ត្រូវបានសម្លាប់ នៅក្នុងការវាយប្រហារអត្តឃាតមួយ ដែលត្រូវបានអះអាងដោយក្រុមតាលីបង់ប៉ាគីស្ថាន។