នគរបាលបានឲ្យដឹងថា ការបាក់រលំអគារ នៅប្រទេសប៉ាគីស្ថាន នាថ្ងៃសុក្រ (ទី៤ ខែកក្កដា) បានបណ្ដាលឲ្យមនុស្សយ៉ាងហោចណាស់ ៥នាក់ស្លាប់ និង ៦នាក់រងរបួស ខណៈដែលជនរងគ្រោះច្រើននាក់ទៀត បានជាប់នៅក្រោមគំនរបាក់បែក។

អ្នកជួយសង្គ្រោះ និងអ្នកស្រុក នៅក្នុងទីក្រុងកំពង់ផែដ៏ធំ Karachi បានជួយធ្វើការ ដើម្បីទាញមនុស្សចេញពីគំនរបាក់បែក បន្ទាប់ពីមានឧបទ្ទវហេតុនៅម៉ោងប្រហែល ១០:១០ព្រឹក ម៉ោងក្រុងស្រុក (ត្រូវម៉ោង ៥:១០នាទី ម៉ោងសកល) ។

មន្ត្រីនគរបាលជាន់ខ្ពស់ លោក Arif Aziz បានប្រាប់សារព័ត៌មាន AFP ថា៖ «រហូតមកដល់ពេលនេះ យើងបានទាញយកសពមនុស្សចំនួន ៥នាក់ និងអ្នករបួស ៦នាក់ហើយ»។ លោកបានបន្ថែមថា មានមនុស្សរហូតដល់ ១០០នាក់ បានរស់នៅក្នុងអគារនោះ។

ចំណែកលោក Saad Edhi ពីមូលនិធិសុខុមាលភាព Edhi ដែលកំពុងដឹកនាំប្រតិបត្តិការជួយសង្គ្រោះ បានប្រាប់សារព័ត៌មាន AFP ថា អាចមាន «មនុស្សយ៉ាងហោចណាស់ពី ៨ ទៅ ១០នាក់ទៀត នៅតែជាប់ក្រោមអគារបាក់រលំនេះ» ដោយពណ៌នាថា វាគឺជា «អគារចាស់ទ្រុឌទ្រោម»។ លោកបានដាក់ចំនួនអ្នកស្លាប់ ៤នាក់។

គួរបញ្ជាក់ថា ការបាក់ធ្លាក់ដំបូល និងបាក់រលំអគារ គឺមិនមែនជារឿងប្លែកនោះឡើយ នៅទូទាំងប្រទេសប៉ាគីស្ថាន ដែលភាគច្រើនដោយសារតែស្តង់ដារសុវត្ថិភាពមិនល្អ និងសម្ភារៈសំណង់មិនមានគុណភាព នៅក្នុងប្រទេសអាស៊ីខាងត្បូងមានប្រជាជនជាង ២៤០លាននាក់នេះ។

ប៉ុន្តែទីក្រុង Karachi ដែលមានប្រជាជនរស់នៅជាង 20 លាននាក់ ល្បីល្បាញជាពិសេស ដោយសារការសាងសង់សំណង់មិនមានគុណភាពល្អ ការពង្រីកការសាងសង់ខុសច្បាប់ ហេដ្ឋារចនាសម្ព័ន្ធចាស់ៗ ភាពចង្អៀតណែន និងកង្វះការអនុវត្តច្បាប់សាងសង់អគារ៕