របងដែកកម្ពស់ ៥ម៉ែត្រនៅទូទាំងទីក្រុងភាគខាងកើត Sinjil ស្ថិតក្នុងតំបន់កាន់កាប់វ៉េសប៊ែង បានធ្វើឲ្យទីក្រុងមួយនេះក្លាយជាគុកឥតជញ្ជាំង ។

របងដែកបានបិទច្រកទាំងអស់ ប៉ុន្តែមានផ្លូវចេញ-ចូលតែមួយគត់នៅក្នុងទីក្រុង Sinjil ដែលត្រូវបានឃ្លាំមើលដោយទាហានអ៊ីស្រាអែល នៅប៉ុស្តិ៍យាមកាម ។

ជញ្ជាំង និងប៉ុស្តិ៍ត្រួតពិនិត្យដំឡើងដោយកងកម្លាំងអ៊ីស្រាអែល បានក្លាយជាផ្នែកមួយនៃជីវិតរស់នៅប្រចាំថ្ងៃសម្រាប់ជនប៉ាឡេស្ទីនជិត ៣លាននាក់ នៅតំបន់វ៉េសប៊ែង ។

ប៉ុន្តែការធ្វើរបងកើនឡើង ចាប់តាំងពីផ្ទុះសង្រ្គាមនៅតំបន់ហ្កាហ្សា បានធ្វើឲ្យទីក្រុង និងភូមិដ្ឋាន ស្ថិតក្រោមការឡោមព័ទ្ធបណ្តោះអាសន្ន ។ របងនៅទីក្រុង Sinjil បានក្លាយជាឧទាហរណ៍យ៉ាងច្បាស់ក្រឡែតមួយនៃការឡោមព័ទ្ធបណ្តោះអាសន្ន ។

យោធាអ៊ីស្រាអែល និយាយថា ពួកគេដំឡើងរបងបែបនេះ ដើម្បីការពារផ្លូវហាយវ៉េ Ramallah-Nablus ។ ដោយមើលឃើញឧបទ្ទេវហេតុភេរវកម្មកើតឡើងច្រំដែល ពួកគេបានសម្រេចចិត្តធ្វើរបង ដើម្បីការពារការចោលដុំថ្មមកលើផ្លូវ និងការរំខានដល់សណ្តាប់ធ្នាប់សាធារណៈម្តងហើយម្តងទៀត ក៏ដូចជាការពារសន្តិសុខជនស៊ីវិលនៅក្នុងតំបន់ ។

យោធាបន្តថា ដោយហេតុថា ពលរដ្ឋនៅអនុញ្ញាតឲ្យចេញ-ចូលតាមច្រកតែមួយ គោលនយោបាយនេះ អនុញ្ញាតឲ្យចូលទីក្រុង Sinjil ដោយសេរី ៕