នៅថ្ងៃសុក្រនេះ កូដកម្មរបស់ក្រុមគ្រប់គ្រងចរាចរណ៍អាកាសបារាំង ឈានដល់ថ្ងៃទី ២ បណ្តាលឲ្យមានការពន្យាពេល និងការលុបចោលជើងហោះហើរបន្ថែមទៀត ពេលចាប់ផ្តើមរដូវកាលធ្វើដំណើរកម្រិតកំពូលរបស់អឺរ៉ុប ។

ទីភ្នាក់ងារអាកាសចរណ៍ស៊ីវិល DGAC និយាយប្រាប់ឲ្យក្រុមហ៊ុនអាកាសចរណ៍លុបចោលជើងហោះហើរ ៤០ភាគរយនៅអាកាសយានដ្ឋានសំខាន់ៗ ៣កន្លែងនៅទីក្រុងប៉ារីសនាថ្ងៃសុក្រនេះ ដោយសារកូដកម្មដែលក្រុមគ្រប់គ្រងអាកាសចរណ៍និយាយថា ខ្វះខាតបុគ្គលិកច្រើន និងសម្ភារៈចាស់ៗ ។

DGAC បន្តថា ពាក់កណ្តាលនៃជើងហោះហើរនៅអាកាសយានដ្ឋានផ្សេងទៀតក្នុងប្រទេសបារាំង ភាគច្រើននៅតំបន់ភាគខាងត្បូងប្រទេស បានរងផលប៉ះពាល់ផងដែរ ។

រដ្ឋមន្រ្តីដឹកជញ្ជូនបារាំងលោក Philippe Tabarot និយាយថា កូដកម្មនេះពុំអាចទទួលយកបាននោះទេ ។

ពេលមានការលុបចោលជើងហោះហើរបែបនេះ DGAC ព្រមានថា អ្នកដំណើរអាចនឹងរងផលប៉ះពាល់ ដោយសារការពន្យាពេល និងការអាក់ខានច្រើន ។

ខណៈពេលនោះដែរ អង្គការអាកាសចរណ៍អឺរ៉ុប A4E និយាយកាលពីយប់ថ្ងៃព្រហស្បតិ៍ថា ជើងហោះហើរ ១.៥០០វ៉ុល ត្រូវបានលុបចោល អំឡុងកូដកម្មរយៈពេល ២ថ្ងៃនេះ និងធ្វើឲ្យប៉ះពាល់ដល់អ្នកដំណើរ ៣០ម៉ឺននាក់ ៕