ទីភ្នាក់ងារចារកម្មហូឡង់ និងអាល្លឺម៉ង់ និយាយថា រុស្ស៊ីបានបង្កើនការប្រើប្រាស់អាវុធគីមីលើទាហានអ៊ុយក្រែន ដែលជាការបំពានដ៏ធ្ងន់ធ្ងរមួយលើច្បាប់អន្តរជាតិ ។

ពួកគេនិយាយនៅថ្ងៃសុក្រនេះថា មាននូវភ័ស្តុតាងយ៉ាងច្រើនបញ្ជាក់ថា កងកម្លាំងទីក្រុងម៉ូស្គូ កំពុងប្រើប្រាស់អាវុធហាមឃាត់ រួមទាំងអាវុធមានសារធាតុក្លរីនផងដែរ ។

រុស្ស៊ីបានច្រានចោលការប្រើប្រាស់អាវុធហាមឃាត់នេះ ដូចគ្នានឹងអ៊ុយក្រែនដែរ ។ កាលពីថ្ងៃពុធកន្លងទៅ អ្នកស្រី Maria Zakharova គឺជាអ្នកនាំពាក្យក្រសួងការបរទេសរុស្ស៊ី អះអាងថា សេវាកម្មសន្តិសុខសហព័ន្ធបានរកឃើញអាវុធអ៊ុយក្រែននៅតំបន់ភាគខាងកើតប្រទេស មានសារធាតុក្លរីន ។

រដ្ឋមន្រ្តីការពារជាតិហូឡង់លោក Ruben Brekelmans និយាយនៅក្នុងសារបង្ហោះលើបណ្តាញព័ត៌មានសង្គម Xថា វាបានក្លាយជារឿងធម្មតាទៅហើយ និងរីករាលដាលកាន់តែខ្លាំង ។ សារធាតុក្លរីន ត្រូវបានទម្លាក់ដោយយានដ្រូនលើទាហានអ៊ុយក្រែននៅក្រៅលេណដ្ឋាន ហើយបន្ទាប់បានសម្លាប់ពួកគេ ។

លោក Brekelmans ដែលអំពាវនាវឲ្យមានទណ្ឌកម្មធ្ងន់ធ្ងរជាងនេះលើរុស្ស៊ីនោះ បានចាត់ទុកការប្រើប្រាស់អាវុធគីមីថា ជារឿងអាក្រក់បំផុត និងមិនអាចទទួលយកបាននោះទេ ៕