ប៉េតង់៖ រាជរដ្ឋាភិបាលកម្ពុជានឹងរៀបចំពិធីប្រគល់ប្រាក់រង្វាន់លើកទឹកចិត្ត ដល់ម្ចាស់មេដាយមាសកីឡាប៉េតង់ជើងឯកពិភពលោកគឺកីឡាការិនី អ៊ុក ស្រីមុំ នាព្រឹកថ្ងៃទី០៥ ខែមករា ឆ្នាំ២០២២ ស្អែកនេះនៅវិមានសន្ដិភាព ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។
យោងតាមថ្នាក់ដឹកនាំជាន់ខ្ពស់នៃសហព័ន្ធកីឡាប៊ូល និងប៉េតង់កម្ពុជាបានឲ្យដឹងថា ចំពោះប្រាក់រង្វាន់លើកទឹកចិត្តរបស់រាជរដ្ឋាភិបាល សម្រាប់ម្ចាស់មេដាយមាសពិភពលោកគឺមានចំនួន ៤០លានរៀល ឬប្រមាណ ១ម៉ឺនដុល្លារដោយអនុវត្តតាមអនុក្រឹត្យ ខណៈគ្រូបង្វឹកក៏នឹងទទួលបានប្រាក់រង្វាន់លើកទឹកចិត្តចំនួន ៤០លានរៀលផងដែរ។ គួរដឹងថា វីរៈកីឡាការិនី អ៊ុក ស្រីមុំ បានរក្សាកំណត់ត្រាពិភពលោកតាមរយៈការបន្ដតំណែងពីអតីតវីរៈកីឡាការិនី កែ ឡេង ក្រោយដណ្ដើមបានមេដាយមាស នៃការប្រកួតកីឡាប៉េតង់ជ្រើសរើសជើងឯកពិភពលោកឆ្នាំ២០២១ នៅប្រទេសអេស្ប៉ាញលើវិញ្ញាសាវាយយកពិន្ទុ (ផ្នែកនារី) កាលពីថ្ងៃទី១៤ ខែវិច្ឆិកា ឆ្នាំ២០២១ កន្លងទៅ។ សម្រាប់វិញ្ញាសាវាយយកពិន្ទុផ្នែកនារីនេះ កម្ពុជាដណ្ដើមបានមេដាយមាសចំនួន ៥សម័យជាប់គ្នាមកហើយ ដោយ ៤លើកមុនដណ្ដើមបានដោយអតីតវីរៈកីឡាការិនី កែ ឡេង កាលពីឆ្នាំ២០១៣, ២០១៥, ២០១៧ និងឆ្នាំ២០១៩ មុនកីឡាការិនី អ៊ុក ស្រីមុំ ដណ្ដើមបានមេដាយមាសពិភពលោកនជាថ្មីម្ដងទៀតកាលពីចុងឆ្នាំ២០២១ កន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
