​

គ្រួសារប៉ាឡេស្ទីនចំនួន៣០គ្រួសារ បានចាកចេញពីលំនៅឋានរបស់ពួកគេនៅតំបន់ដាច់ស្រយាលមួយនៃតំបន់ West Bank ដែលកាន់កាប់ដោយអ៊ីស្រាអែល កាលពីថ្ងៃសុក្រ ទី៤ ខែកក្កដា ដោយនិយាយថាពួកគេត្រូវបានបង្ខំឱ្យចេញ បន្ទាប់ពីការធ្វើទុក្ខបុកម្នេញមិនអស់មិនហើយ និងអំពើហិង្សាជាច្រើនឆ្នាំដោយអ្នកតាំងលំនៅអ៊ីស្រាអែល។

ក្រុមគ្រួសារជាច្រើន ដែលជាសមាជិកនៃកុលសម្ព័ន្ធ Bedouin Mleihat មកពីសហគមន៍គង្វាលមួយ នៅជ្រលងភ្នំហ្សកដានី បានចាប់ផ្តើមរុះរើលំនៅឋានដែលសាងសង់ដោយដែកនិងក្តារឈើ កាលពីថ្ងៃសុក្រ ដោយសារតែការភ័យខ្លាចនៃការវាយប្រហារបន្ថែមទៀត។

ខណៈពលរដ្ឋប៉ាឡេស្ទីនបានរុះរើជំរំរបស់ពួកគេ អ្នកតាំងលំនៅអ៊ីស្រាអែលម្នាក់ប្រដាប់ដោយកាំភ្លើងវែង និងទាហានអ៊ីស្រាអែលជាច្រើននាក់ បានសំឡឹងមើល។ សហគមន៍ប៉ាឡេស្ទីននៅជ្រលងភ្នំហ្សកដានី ជាតំបន់មានប្រជាជនរស់នៅនៅដាច់ៗពីគ្នានៅជិតទន្លេហ្សកដានី បានប្រឈមនឹងការរំខានកាន់តែខ្លាំងឡើងពីអ្នកតាំងលំអ៊ីស្រាអែល ក្នុងរយៈពេលប៉ុន្មានឆ្នាំថ្មីៗនេះ រួមទាំងអំពើហិង្សា។