កាលពីថ្ងៃសុក្រ (ទី៤ ខែកក្កដា) ប្រធានាធិបតីអាមេរិក លោក Donald Trump បាននិយាយថា លោក «មិនសប្បាយចិត្តខ្លាំង» បន្ទាប់ពីបានជជែកតាមទូរសព្ទជាមួយលោក Vladimir Putin ស្តីពីបញ្ហាសង្រ្គាម នៅប្រទេសអ៊ុយក្រែន ដោយបញ្ជាក់ថា មេដឹកនាំរុស្ស៊ី គ្រាន់តែចង់ «បន្តសម្លាប់មនុស្សទៀត»។

លោក Trump បានប្រាប់អ្នកសារព័ត៌មាននៅលើយន្តហោះ Air Force One ថា៖ «វាជាស្ថានភាពដ៏លំបាកមួយ។ ខ្ញុំបានប្រាប់អ្នកថា ខ្ញុំមិនសប្បាយចិត្តនោះឡើយ ក្រោយបានជជែកតាមទូរសព្ទជាមួយលោកប្រធានាធិបតី Putin។ លោកចង់ធ្វើគ្រប់មធ្យោបាយ ពោលគឺបន្តសម្លាប់មនុស្ស។ វាគឺជារឿងមិនល្អទេ»។

ជាមួយគ្នានេះ លោក Trump ក៏បានបង្ហើបផងដែរថា ទីបំផុត លោកអាចនឹងត្រៀមដាក់ទណ្ឌកម្មយ៉ាងតឹងរ៉ឹងលើរុស្ស៊ី ដែលបានផ្អាកអស់រយៈពេល ៦ខែកន្លងមក ខណៈដែលលោកព្យាយាមបញ្ចុះបញ្ចូលលោក Putin ឲ្យបញ្ចប់សង្រ្គាម។ លោក Trump បានប្រាប់ថា៖ «យើងពិភាក្សាអំពីការដាក់ទណ្ឌកម្មយ៉ាងច្រើន។ ហើយខ្ញុំយល់ថា វាអាចនឹងកំពុងមកដល់»។

លោក Trump បានបន្ថែមថា ក្នុងពេលជាមួយគ្នានេះដែរ រូបលោក និងប្រធានាធិបតីអ៊ុយក្រែន លោក Volodymyr Zelenskyy មាននូវ «ការសន្ទនាតាមទូរសព្ទជាយុទ្ធសាស្ត្រយ៉ាងល្អប្រសើរ» កាលពីថ្ងៃសុក្រ ខណៈដែលក្ដីបារម្ភបានកើនឡើងនៅក្នុងទីក្រុងគីវ ជុំវិញការផ្តល់ជំនួយយោធារបស់សហរដ្ឋអាមេរិក៕