រដ្ឋមន្ត្រីការបរទេសបារាំង លោក Jean-Noel Barrot កាលពីថ្ងៃសុក្រ (ទី៤ ខែកក្កដា) បាននិយាយថា លោកស្វាគមន៍ការសម្រេចរបស់ប្រទេសចិន ក្នុងការបិទការស៊ើបអង្កេតលើផលិតផលស្រាកូញាក់អឺរ៉ុប ប៉ុន្តែចំណុចសំខាន់ៗមួយចំនួន នៅតែមិនទាន់ដោះស្រាយបានឡើយ។ 

លោក Barrot បានធ្វើការអត្ថាធិប្បាយបែបនេះ អំឡុងជួបជាមួយរដ្ឋមន្ត្រីការបរទេសចិន លោក Wang Yi ដោយលោកបានបន្ថែមថា មាន «ការពិភាក្សាក្នុងន័យស្ថាបនា» រវាងថ្នាក់ដឹកនាំនៃប្រទេសទាំង២ ដែលបាននិងកំពុងទាក់ទងគ្នា ដើម្បីបានឈានដល់ដំណោះស្រាយមួយ។ 

ក្រសួងពាណិជ្ជកម្មចិន បានឲ្យដឹងនៅក្នុងសេចក្តីសម្រេចចុងក្រោយថា ប្រទេសចិននឹងគិតចាប់ពីថ្ងៃសៅរ៍ (ទី៥ ខែកក្កដា) នូវកាតព្វកិច្ចពន្ធគយរហូតដល់ ៣៤,៩ភាគរយ សម្រាប់រយៈពេល ៥ឆ្នាំ លើផលិតផលស្រាកូញាក់ដែលមានប្រភពពីសហភាពអឺរ៉ុប (EU) ដោយភាគច្រើនស្រាកូញាក់មកពីប្រទេសបារាំង។

ក្រសួងបានលើកឡើងនៅក្នុងសេចក្តីថ្លែងការណ៍ថា ប៉ុន្តែភាគច្រើននៃឧស្សាហកម្មស្រាកូញាក់របស់ប្រទេសបារាំង ក្នុងនោះរួមទាំងម៉ាកយីហោធំៗដែលគ្រប់គ្រងដោយក្រុមហ៊ុន LVMH គឺ Hennessy និង Remy Martin នឹងត្រូវបានលើកលែងពីកាតព្វកិច្ចបង់ពន្ធនេះដែលបានអនុញ្ញាតឲ្យផលិតផលសា្រកូញាក់ទាំងនោះលក់ក្នុងតម្លៃទាបបំផុត។ តែយ៉ាងណាក្ដី ក្រសួងមិនបានបង្ហាញឲ្យដឹងពីតម្លៃអប្បបរមានោះឡើយ។ ប្រទេសចិនគឺជាទីផ្សារដ៏ធំបំផុតរបស់ពិភពលោក សម្រាប់ស្រាកូញាក់ ដោយសារផ្អែកលើទឹកប្រាក់លក់បាន។ 

គួរបញ្ជាក់ថា លោក Wang កំពុងបំពេញទស្សនកិច្ចនៅអឺរ៉ុប ក្នុងសប្តាហ៍នេះ ដើម្បីស្វែងរកការដាក់ចេញនូវមូលដ្ឋានគ្រឹះ សម្រាប់កិច្ចប្រជុំកំពូល រវាង EU និងថ្នាក់ដឹកនាំចិន នៅចុងខែនេះ៕