ប្រធានាធិបតីសហរដ្ឋអាមេរិក លោក Donald Trump បាននិយាយថា អ៊ីរ៉ង់ពុំបានយល់ព្រមក្នុងការត្រួតពិនិត្យកម្មវិធីនុយក្លេអ៊ែររបស់ខ្លួន ឬបោះបង់ការចម្រាញ់សារធាតុអ៊ុយរ៉ានីញ៉ូមនោះទេ។

លោកបានប្រាប់អ្នកយកព័ត៌មាននៅលើយន្តហោះ Air Force One កាលពីថ្ងៃសុក្រថា លោកជឿថាកម្មវិធីនុយក្លេអ៊ែររបស់ទីក្រុងតេអេរ៉ង់ ត្រូវបានដើរថយក្រោយជាអចិន្ត្រៃយ៍ ទោះបីជាលោកទទួលស្គាល់ថា អ៊ីរ៉ង់ អាចចាប់ផ្តើមការផលិតឡើងវិញនៅទីតាំងផ្សេងក៏ដោយ។

លោក Trump បាននិយាយថា លោកនឹងពិភាក្សាបញ្ហាអ៊ីរ៉ង់ជាមួយនាយករដ្ឋមន្ត្រីអ៊ីស្រាអែល Benjamin Netanyahu នៅពេលលោកធ្វើទស្សនកិច្ចនៅសេតវិមាននៅថ្ងៃចន្ទទី៧កក្កដា ជាទីដែលបទឈប់បាញ់ដ៏សំខាន់ នៅតំបន់ហ្កាហ្សា ត្រូវគេរំពឹងថានឹងក្លាយជារបៀបវារៈកំពូល។

លោក Trumpបាននិយាយថា រូបលោកនឹងមិនអនុញ្ញាតឲ្យប្រទេសអ៊ីរ៉ង់បន្តមហិច្ចតាកម្មវិធីនុយក្លេអ៊ែររបស់ខ្លួនបានឡើយ ដោយបន្ថែមថា ក្រុមមន្ត្រីអ៊ីរ៉ង់ ចង់ជួបលោកដើម្បីពិភាក្សាបញ្ហានេះ។

គួររម្លឹកថា អ្នកបើកយន្តហោះទម្លាក់គ្រាប់បែក B-2 បានទម្លាក់គ្រាប់បែកខួងបំផ្ទុះគោលដៅចំនួន ១៤ គ្រាប់លើទីតាំងនុយក្លេអ៊ែរសំខាន់ៗទាំងបីរបស់អ៊ីរ៉ង់ ក្នុងចំណាត់ការដែលលោក Trump អះអាងថាបានកម្ទេចចោលទាំងស្រុង នូវកម្មវិធីនុយក្លេអ៊ែររបស់របបអ៊ីរ៉ង់៕