យោងតាមប្រព័ន្ធផ្សព្វផ្សាយរដ្ឋបានឱ្យដឹងថា មេដឹកនាំកំពូលរបស់អ៊ីរ៉ង់លោក Ayatollah Ali Khamenei បានលេចមុខជាសាធារណៈលើកដំបូងចាប់តាំងពីការចាប់ផ្តើមនៃជម្លោះអ៊ីរ៉ង់ជាមួយអ៊ីស្រាអែល។

ទូរទស្សន៍រដ្ឋបានបង្ហាញវីដេអូ លោកស្វាគមន៍ក្រុមអ្នកបួងសួងនៅវិហារឥស្លាមមួយកាលពីថ្ងៃសៅរ៍ក្នុងអំឡុងពេលពិធីមួយថ្ងៃ មុនពិធីបុណ្យ Ashura របស់សាសនាអ៊ីស្លាម Shia។

ការបង្ហាញខ្លួនចុងក្រោយរបស់លោក Khamenei គឺនៅក្នុងសុន្ទរកថាដែលបានថតទុកក្នុងអំឡុងពេលជម្លោះជាមួយអ៊ីស្រាអែល ដែលបានចាប់ផ្តើមកាលពីថ្ងៃទី ១៣ ខែមិថុនា និងអំឡុងពេលដែលមេបញ្ជាការកំពូលអ៊ីរ៉ង់ និងអ្នកវិទ្យាសាស្ត្រនុយក្លេអ៊ែរមួយចំនួនត្រូវបានសម្លាប់។

អ៊ីស្រាអែលបានបើកការវាយប្រហារដ៏ភ្ញាក់ផ្អើលមួយលើទីតាំងនុយក្លេអ៊ែរ និងយោធាក្នុងប្រទេសអ៊ីរ៉ង់ បន្ទាប់មកអ៊ីរ៉ង់បានសងសឹកដោយការវាយប្រហារតាមអាកាសសំដៅលើអ៊ីស្រាអែល។

ក្នុងអំឡុងសង្រ្គាមរយៈពេល ១២ ថ្ងៃជាមួយអ៊ីស្រាអែល លោក Khamenei បានបង្ហាញខ្លួននៅលើកញ្ចក់ទូរទស្សន៍នៅក្នុងសារជាវីដេអូចំនួនបី ហើយមានការរំពឹងទុកថារូបលោក កំពុងលាក់ខ្លួននៅក្នុងរូងក្រោមដីមួយកន្លែង៕