យោធាអ៊ីស្រាអែលបានចេញការព្រមានជម្លៀសប្រជាជនប៉ាឡេស្ទីននៅតំបន់ Khan Younis ភាគខាងត្បូងដែនដីហ្កាហ្សាស្ទ្រីប( Gaza Strip) កាលពីល្ងាចថ្ងៃអាទិត្យ ដោយនិយាយថា ខ្លួនកំពុងបើកការទម្លាក់គ្រាប់បែកយ៉ាងខ្លាំងក្លានៅក្នុងតំបន់នោះ។

អ្នកនាំពាក្យយោធាលោក Avichay Adraee បាននិយាយលើប្រព័ន្ធផ្សព្វផ្សាយសង្គម X ថា កងកម្លាំងអ៊ីស្រាអែល កំពុងប្រតិបត្តិការជាមួយនឹងកម្លាំងដ៏ខ្លាំងក្នុងតំបន់ ហើយនឹងវាយប្រហារតំបន់ទាំងឡាយណាដែលប្រើជាមូលដ្ឋានបាញ់គ្រាប់រ៉ូកែត ចូលទៅកាន់រដ្ឋអ៊ីស្រាអែល។

លោកបានបន្ថែមថា ដើម្បីសុវត្ថិភាពរបស់អ្នក អ្នកត្រូវតែជម្លៀសភ្លាមៗទៅភាគខាងលិច ហើយជៀសវាងការវិលត្រឡប់ទៅកាន់តំបន់ប្រយុទ្ធដ៏គ្រោះថ្នាក់។

កាលពីព្រឹកថ្ងៃអាទិត្យ កងទ័ពអ៊ីស្រាអែលបាននិយាយក្នុងសេចក្តីថ្លែងការណ៍មួយថា ខ្លួនបានវាយប្រហារទីតាំងដាច់ដោយឡែកប្រហែល ១៣០ នៅទូទាំងតំបន់ហ្កាហ្សាស្ទ្រីប។

យោងតាមតួលេខដែលចេញផ្សាយកាលពីថ្ងៃអាទិត្យដោយអាជ្ញាធរសុខាភិបាលហ្កាហ្សា ចាប់តាំងពីអ៊ីស្រាអែលបានចាប់ផ្តើមយុទ្ធនាការយោធារបស់ខ្លួនឡើងវិញនៅតំបន់ហ្កាហ្សាថ្ងៃទី ១៨ ខែមីនា យ៉ាងហោចណាស់មានជនជាតិប៉ាឡេស្ទីនចំនួន ៦.៨៦០នាក់ត្រូវបានសម្លាប់ និង២៤.២២០នាក់បានរងរបួស។

 ចំនួនអ្នកស្លាប់សរុបនៅហ្កាហ្សា ចាប់តាំងពីសង្គ្រាមបានចាប់ផ្តើមក្នុងខែតុលា ឆ្នាំ ២០២៣ បានកើនឡើងដល់ ៥៧.៤១៨ នាក់ ដោយមានអ្នករងរបួសចំនួន១៣៦.២៦១នាក់ គិតត្រឹមថ្ងៃអាទិត្យចុងសប្ដាហ៍មុននេះ៕