ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃសៅរ៍ (០៥ កក្កដា) ចុងសប្ដាហ៍ថា កិច្ចសន្ទនាតាមទូរសព្ទចុងក្រោយបំផុតរបស់លោក ជាមួយលោកប្រធានាធិបតីអាមេរិក Donald Trump នៅថ្ងៃសុក្រសប្តាហ៍ដដែលនោះ គឺមានភាពល្អប្រសើរ និង "ប្រកបដោយផ្លែផ្កាបំផុត" រហូតមកទល់បច្ចុប្បន្ននេះ។

ថ្លែងនៅក្នុងសុន្ទរកថាតាមវីដេអូពេលយប់របស់ខ្លួន លោក Zelenskiy បាននិយាយថា "ទាក់ទងនឹងកិច្ចសន្ទនាជាមួយប្រធានាធិបតីអាមេរិក ដែលកើតឡើងនៅថ្ងៃសុក្រសប្ដាហ៍មុន គឺប្រហែលជាកិច្ចពិភាក្សាដ៏ល្អបំផុតមួយដែលរូបលោកបានធ្វើរហូតមកទល់បច្ចុប្បន្ននេះ និងប្រកបដោយផ្លែផ្កាបំផុតផងដែរ"។

លោក Zelenskiy បន្តថា "រូបលោកទាំងពីរបានពិភាក្សាពីបញ្ហាការពារដែនអាកាស ហើយអ៊ុយក្រែនដឹងគុណណាស់ចំពោះឆន្ទៈក្នុងការជួយពីសហរដ្ឋអាមេរិក។ ប្រព័ន្ធការពារមីស៊ីលប៉ាទ្រីយ៉ូត (Patriot) គឺជាគន្លឹះដ៏សំខាន់ក្នុងការការពារប្រឆាំងនឹងការគំរាមកំហែងគ្រាប់ផ្លោង"។ លោកបន្ថែមថា មេដឹកនាំទាំងពីរបានពិភាក្សាពី "បញ្ហាសំខាន់ៗច្រើនទៀត" ដែលក្រុមមន្ត្រីនៃភាគីទាំងពីរ នឹងត្រូវជជែកបន្ត នៅក្នុងកិច្ចប្រជុំនាពេលខាងមុខ។



ចំណែកលោក Trump វិញបានប្រាប់អ្នកសារព័ត៌មាននៅថ្ងៃសុក្រដដែលនោះថា លោកបានធ្វើជំនួបតាមទូរសព្ទដ៏ល្អជាមួយលោក Zelenskiy និងរំលឹកឡើងវិញពីការខកចិត្តរបស់លោកក្នុងការសន្ទនាទូរសព្ទដាច់ដោយឡែកមួយជាមួយប្រធានាធិបតីរុស្ស៊ី លោក Vladimir Putin ជុំវិញអ្វីដែលលោកហៅថា ជាការពុំមានឆន្ទៈគ្រប់គ្រាន់របស់ទីក្រុងមូស្គូ ដើម្បីធ្វើការឆ្ពោះទៅរកបទឈប់បាញ់៕