ព្យុះទីហ្វុង Danas បានបោកបក់នៅភាគខាងត្បូងកោះតៃវ៉ាន់ ដោយមានខ្យល់បក់និងភ្លៀងធ្លាក់ខ្លាំងនៅព្រឹកថ្ងៃច័ន្ទនេះ ដោយបានបណ្តាលឲ្យមនុស្ស២នាក់ស្លាប់ និងរងរបួសជាង៣៣០នាក់ នៅក្នុងការវាយបោកបក់ដ៏កម្រ ទៅកាន់ឆ្នេរភាគខាងលិចដែលមានប្រជាជនរស់នៅច្រើនរបស់កោះនេះ ខណៈអាជីវកម្ម និងសាលារៀន ត្រូវបានបិទ។

ព្យុះទីហ្វុង Danas ស្ថិតនៅចំណុចមួយដែលត្រូវបានចុះបញ្ជីដោយអាជ្ញាធរអាកាសធាតុរបស់កោះតៃវ៉ាន់ក្នុងកម្រិតខ្លាំងបំផុតទីពីរ ដែលបានបក់ឆ្ពោះទៅភាគខាងជើងទៅកាន់ច្រកសមុទ្រតៃវ៉ាន់ បន្ទាប់ពីបានបោកបក់ដល់ដីគោកនៅតាមឆ្នេរភាគនិរតីរបស់កោះនេះកាលពីល្ងាចថ្ងៃអាទិត្យ។

រដ្ឋបាលអាកាសធាតុកណ្តាលបាននិយាយថា ព្យុះទីហ្វុង Danas បានបោកបក់ទៅលើឆ្នេរភាគខាងលិច កោះតៃវ៉ាន់កាលពីល្ងាចថ្ងៃអាទិត្យ (៦ កក្កដា) បានបង្កឱ្យមានទឹកជំនន់ និងបំណាក់ដី។

ក្រុមអ្នកសង្គ្រោះ បាននិយាយថា ភាគច្រើនក្នុងចំណោមមនុស្សជិត៣.០០០នាក់ដែលត្រូវបានជម្លៀសចេញពីលំនៅឋានរបស់ពួកគេ បានរស់នៅក្នុងតំបន់ភ្នំជុំវិញទីក្រុងកំពង់ផែ Kaohsiung ភាគខាងត្បូង។

អាជ្ញាធរនិយាយថា យ៉ាងហោចណាស់មានបំណាក់ដីចំនួន១០កន្លែង ត្រូវបានកត់ត្រា និងតំបន់ចំនួន៤៩តំបន់បានជន់លិចដោយទឹកជំនន់ ប៉ុន្តែទឹកបានស្រកចុះទៅវិញ។ កោះតៃវ៉ាន់ ធ្លាប់មានព្យុះត្រូពិកញឹកញាប់ ចាប់ពីខែកក្កដា ដល់ខែតុលា។