អារម្មណ៍របស់អ្នកស្រុកនៅតំបន់ហ្កាហ្សា កាន់តែតានតឹងឡើង និងស្រុតចុះខ្លាំងលើលទ្ធភាពនៃបទឈប់បាញ់ថ្មី ក្រោយការវាយលុករបស់អ៊ីស្រាអែល ជិត ២១ខែ ដែលជម្លៀសប្រជាជនស្ទើរតែទាំងមូលនៃទឹកដីដ៏តូចចង្អៀតនេះ។ កាលពីព្រឹកថ្ងៃអាទិត្យ (០៦ កក្កដា) នៅទីក្រុងហ្កាហ្សា អ្នកស្រុកកំពុងជជែកពីប្រធានបទដដែលៗតែមួយប៉ុណ្ណោះ នោះគឺលទ្ធភាពនៃសន្តិភាពសម្រាប់ទឹកដីទាំងមូល ប៉ុន្តែមានមនុស្សតិចណាស់ដែលមានក្ដីសង្ឈឹមលើរឿងនេះ។

អ្នកស្រុកមួយចំនួនមកពីទីក្រុង Beit Lahiya ដែលត្រូវបំផ្លិចបំផ្លាញនៅចុងភាគខាងជើងហ្កាហ្សា បាននិយាយថា ពួកគេសប្បាយចិត្តជាមួយនឹងការឆ្លើយតបជាវិជ្ជមានពីក្រុមហាម៉ាស ចំពោះសំណើចុងក្រោយបង្អស់ដែលគាំទ្រដោយអាមេរិកនៃលក្ខខណ្ឌសម្រាប់កិច្ចព្រមព្រៀងមួយ ប៉ុន្តែស្ទើរតែមិនហ៊ានសង្ឃឹមសម្រាប់ជោគជ័យពិតប្រាកដឡើយ។

រហូតមកដល់ពេលនេះ អ៊ីស្រាអែលបានច្រានចោលការទាមទាររបស់ក្រុមហាម៉ាស សម្រាប់ការផ្លាស់ប្តូរក្នុងសេចក្តីព្រាងនៃកិច្ចព្រមព្រៀង ១៤ចំណុច ដែលបានផ្សព្វផ្សាយកាលពីសប្តាហ៍មុន ប៉ុន្តែកាលពីថ្ងៃអាទិត្យ ភាគីជម្លោះទាំងពីរបានធ្វើកិច្ចចរចាដោយប្រយោលជាលើកដំបូងនៅប្រទេសកាតា ដែលបានបញ្ចប់ដោយពុំមានវឌ្ឍនភាពទាល់តែសោះ។

គួររម្លឹកថា មានបទឈប់បាញ់ពីរលើកមកហើយនៅហ្កាហ្សា គឺមួយនៅខែវិច្ឆិកា ឆ្នាំ២០២៣ និងលើកទីពីរនៅឆ្នាំនេះ ដែលចូលជាធរមានក្នុងខែមករា ប៉ុន្តែក្រោយមកបានដួលរលំក្នុងខែមីនា នៅពេលអ៊ីស្រាអែល បដិសេធចំពោះការសន្យាថានឹងឈានទៅដំណាក់កាលទីពីរ ដែលអាចនាំទៅដល់ការបញ្ចប់ជម្លោះយ៉ាងច្បាស់លាស់ជាអចិន្រ្តៃយ៍នៅពេលនោះ៕