អេស្ប៉ាញ៖ ​ក្រុម​ឃ្លាំមើល​មួយ​បាន​និយាយ​កាលពី​ថ្ងៃ​ចន្ទ​ថា ជនអន្តោប្រវេសន៍​ជាង ៤,៤០០​នាក់រួម​ទាំង​កុមារ​យ៉ាងតិច ២០៥​នាក់​បានបាត់​ខ្លួន​នៅ​សមុទ្រ​ដែល​ព្យាយាម​ទៅដល់​ប្រទេស​អេ​ស្ប៉ា​ញ​ក្នុង​ឆ្នាំ២០២១ ដែលជា​ចំនួន​ច្រើនជាង​ទ្វេដង​នៃ​តួលេខ​កាលពី​ឆ្នាំមុន និង​ច្រើន​ជាង​គេ​បំផុត​ចាប់​តាំង​ពី​ក្រុម​នេះ​បាន​ចាប់ផ្តើម​រាប់​ចំនួន​ក្នុង​ឆ្នាំ២០១៨ មក​។

​ក្រុម​ឃ្លាំមើល​ជនអន្តោប្រវេសន៍​ឈ្មោះថា Walking Borders ឬ Caminando Fronteras បាន​ស្តី​បន្ទោសផ្លូវ​គ្រោះថ្នាក់​កាន់​តែ​ខ្លាំង​ឡើង និង​នាវា​តូច​ៗ​គ្មាន​សុវត្ថិភាព​មួយ​ចំនួន ដើម្បី​ជួយ​ក្រុម​ជនអន្តោប្រវេសន៍​រួច​ពី​អត្រា​ស្លាប់​ដែល​ចេះតែ​កើន​ឡើង​នៅ​សមុទ្រ​។ យោង​តាមស្ថិតិ​ផ្លូវការ​របស់​អេ​ស្ប៉ា​ញ ក្រុម​ជនអន្តោប្រវេសន៍​គ្មាន​ឯកសារ​ចំនួន ៣៩,០០០​នាក់​បាន​ទៅដល់​អេ​ស្ប៉ា​ញ​ដោយ​ជោគជ័យ​តាម​សមុទ្រ ឬ​ផ្លូវគោក​កាលពី​ឆ្នាំមុន ដែល​ជា​តួលេខ​ស្រដៀង​គ្នា​ទៅ​នឹង​ឆ្នាំ​កន្លងទៅ​។ ​ក្រុម​ Walking Borders បាន​និយាយ​ថា ​មាន​ជាង ៩០% នៃ​អ្នក​បាត់​ខ្លួន ឬ​អ្នក​ស្លាប់​នៅ​លើ​កប៉ាល់​ចំនួន ១២៤​គ្រឿង​ដែល​កំពុង​ធ្វើ​ដំណើរ​ទៅកាន់​កោះ Canary របស់​អេ​ស្ប៉ា​ញ​ក្នុង​មហាសមុទ្រ​អា​ត្ល​ង់​ទិក​គិត​ត្រឹម​ថ្ងៃទី២០ ខែ​ធ្នូ​។

ចាប់​តាំង​ពី​ឆ្នាំ២០២០ មក​កោះ​នានា​នៅ​ក្បែរ​ឆ្នេរសមុទ្រ​នៃ​ទ្វីប​អាហ្វ្រិក បាន​ក្លាយ​ជា​គោលដៅ​ចម្បង​សម្រាប់​ក្រុម​ជនអន្តោប្រវេសន៍ ​ព្យាយាម​ទៅដល់​ប្រទេស​អេ​ស្ប៉ា​ញដោយ​ក្នុង​នោះ​ក៏​មាន​ក្រុម​តូច​ៗ​ផ្សេងទៀត​ជាច្រើន ព្យាយាម​ឆ្លង​សមុទ្រ​មេ​ឌី​ទែ​រ៉ា​ណេ​ទៅ​ដីគោក​អេ​ស្ប៉ា​ញ​ដែរ ដោយ​ពួកគេ​រំពឹង​ថា ​នឹង​មានឱកាស​កសាង​អនាគត​ភ្លឺស្វាង​នៅ​លើ​ទឹកដី​អឺរ៉ុប គេច​ចេញពី​សង្គ្រាម និង​ភាព​ក្រីក្រ​នៅ​ប្រទេស​កំណើត​របស់​ខ្លួន​។ ​អង្គការ​ទេសន្តរប្រវេសន៍​អន្តរជាតិ (IOM) របស់​អង្គការសហប្រជាជាតិ​បាន​រាប់​ចំនួន​មនុស្ស ៩៥៥​នាក់​ដែល​បាន​ស្លាប់ ឬ​បាត់​ខ្លួន​ក្នុង​ឆ្នាំ២០២១ ដែល​ព្យាយាម​ទៅដល់​កោះ Canary ត្រឹម​ថ្ងៃទី២២ ខែធ្នូ ជា​តួលេខ​ខ្ពស់​បំផុត​ដែល​ខ្លួន​បាន​កត់ត្រា​ចាប់​តាំង​ពី​ឆ្នាំ២០១៤ មក៕

អត្ថបទ៖ សុខមាន