អ៊ីស្រាអែលបានបើកការវាយប្រហារតាមអាកាសជាបន្តបន្ទាប់លើកំពង់ផែសមុទ្រក្រហមរបស់យេម៉ែន ក្នុងខេត្ត Hodeidah ភាគខាងលិច កាលពីយប់ថ្ងៃអាទិត្យ។

ការវាយប្រហារនេះ បានកើតឡើង រយៈពេលប៉ុន្មាននាទីបន្ទាប់ពីយោធាអ៊ីស្រាអែល បានចេញការព្រមានអំពីការជម្លៀសជាបន្ទាន់ នៅលើប្រព័ន្ធផ្សព្វផ្សាយសង្គម X។ សាក្សីបានរាយការណ៍ពីការផ្ទុះនៅក្នុងទីតាំងជាច្រើន នៅតាមបណ្តោយឆ្នេរសមុទ្រភាគខាងលិចនៃប្រទេសយេម៉ែន រួមទាំងកំពង់ផែ Hodeidah ផង   ដែរ។

រដ្ឋមន្ត្រីការពារជាតិអ៊ីស្រាអែលលោក Israel Katz បាននិយាយនៅក្នុងសេចក្តីថ្លែងការណ៍មួយថា ការវាយប្រហារ បានកំណត់គោលដៅទៅលើអ្វីដែលលោកបានពិពណ៌នាថា ជាបន្ទាយរបស់ក្រុមកហ៊ួទី រួមទាំងកំពង់ផែ Hodeidah, As Salif និង កំពង់ផែ Ras Isa ស្ថានីយថាមពល Ras Katib និងនាវា Galaxy Leader ដែលជានាវាដែលរឹបអូសដោយកងកម្លាំងហ៊ួទី ក្នុងខែវិច្ឆិកា ឆ្នាំ ២០២៣។

យោធាអ៊ីស្រាអែលបាននិយាយថា កំពង់ផែដែលជាគោលដៅ ត្រូវបានប្រើប្រាស់ដោយក្រុមហ៊ួទី ដើម្បី     «បញ្ជូនសព្វាវុធពីរបបអ៊ីរ៉ង់ ដែលបន្ទាប់មកត្រូវបានប្រើ ដើម្បីធ្វើប្រតិបត្តិការភេរវកម្មប្រឆាំងនឹងរដ្ឋអ៊ីស្រាអែល និងសម្ព័ន្ធមិត្តរបស់ខ្លួន» ។

យោធាបានបន្ថែមថា នាវា Galaxy Leader ត្រូវបានបំពាក់ដោយប្រព័ន្ធរ៉ាដា ដែលប្រើដើម្បីតាមដាននាវានៅក្នុងសមុទ្រក្រហម ដោយជួយសម្រួលដល់សកម្មភាពរបស់ក្រុមសកម្មប្រយុទ្ធបន្ថែមទៀត។

លោក Katz បានបញ្ជាក់ថា ការកើនឡើងភាពតានតឹងកាន់តែធំឡើង អាចកើតឡើង ដោយនិយាយថា    «ប្រទេសយេម៉ែន នឹងត្រូវបានចាត់ទុកដូចគ្នានឹងទីក្រុងតេអេរ៉ង់របស់ប្រទេសអ៊ីរ៉ង់ផងដែរ»។