ប្រមុខក្រុមប្រដាប់អាវុធប៉ាឡេស្ទីនដែលប្រឆាំងនឹងក្រុមហាម៉ាស និងចោទប្រកាន់ថា បានបទលួចជំនួយនៅហ្គាហ្សាស្ទ្រីប បានបញ្ជាក់កាលពីថ្ងៃអាទិត្យថា ខ្លួនកំពុងសម្របសម្រួលជាមួយយោធាអ៊ីស្រាអែល ក្នុងបទសម្ភាសន៍ជាមួយវិទ្យុសាធារណៈ។

លោក Yasser Abu Shabab បាននិយាយថា ក្រុមរបស់ខ្លួនដែលត្រូវបានគេស្គាល់ថា ជាកងកម្លាំងប្រជាប្រិយ អាចធ្វើដំណើរដោយសេរីនៅក្នុងតំបន់ ដែលស្ថិតនៅក្រោមការគ្រប់គ្រងរបស់យោធាអ៊ីស្រា     អែល និងបានទំនាក់ទំនងប្រតិបត្តិការរបស់ពួកគេ ជាមុន។

លោកបាននិយាយនៅក្នុងបទសម្ភាសន៍ជាមួយវិទ្យុ Makan ដែលជាវិទ្យុសាធារណៈជាភាសាអារ៉ាប់របស់អ៊ីស្រាអែលថា៖«យើងជូនដំណឹងដល់ពួកគេ ប៉ុន្តែយើងធ្វើសកម្មភាពយោធាដោយខ្លួនឯង»។

លោក Abu Shabab ក៏បាននិយាយផងដែរថា ក្រុមរបស់លោកបានទទួល «ការគាំទ្រផ្នែកភស្តុភារ និងហិរញ្ញវត្ថុពីភាគីជាច្រើន» ដោយមិននិយាយអំពីអ៊ីស្រាអែលដោយផ្ទាល់ទេ។

«មានរឿងជាច្រើន ដែលយើងមិនអាចនិយាយជាសាធារណៈបាន»។

កាលពីខែមុន អាជ្ញាធរអ៊ីស្រាអែលបានទទួលស្គាល់ថា បានផ្តល់ការគាំទ្រដល់ក្រុមប្រដាប់អាវុធប៉ាឡេស្ទីនដែលប្រឆាំងនឹងក្រុមហាម៉ាសនៅតំបន់ហ្កាហ្សា ដោយមិនបញ្ចេញឈ្មោះពួកគេទេ ទោះបីជារបាយការណ៍ប្រព័ន្ធផ្សព្វផ្សាយក្នុងស្រុក បានកំណត់អត្តសញ្ញាណក្រុមនោះថា ជាក្រុមរបស់លោក Abu Shabab ក៏ដោយ។