អគ្គសេនាធិការនៃកងកម្លាំងប្រដាប់អាវុធអ៊ុយក្រែន បានរាយការណ៍នៅថ្ងៃចន្ទ (០៧ កក្កដា) នេះថា រុស្ស៊ី បានបាត់បង់កងទ័ពចំនួន ១.០២៧.៥៤០នាក់ នៅអ៊ុយក្រែន ចាប់តាំងពីការចាប់ផ្តើមនៃប្រតិបត្តិការយោធាពិសេសរបស់ខ្លួនកាលពីថ្ងៃទី២៤ ខែកុម្ភៈ ឆ្នាំ២០២២។ តួលេខនេះរួមមានជនរងគ្រោះចំនួន ១.១០០នាក់ ដែលកម្លាំងរុស្ស៊ី បានបាត់បង់ក្នុងថ្ងៃកន្លងទៅ។

របាយការណ៍បានលម្អិតថា រុស្ស៊ីបានបាត់បង់រថក្រោះ ១០.៩៩៥គ្រឿង, យានចម្បាំងពាសដែក ២២.៩៦៣គ្រឿង, រថពាសដែកនិងរថក្រោះឥន្ធនៈ ៥៤.៣៧០គ្រឿង, ប្រព័ន្ធកាំភ្លើងធំ ២៩.៩៩៣គ្រឿង, ប្រព័ន្ធរ៉ូកែតពហុមុខងារ ១.៤៣២គ្រឿង ប្រព័ន្ធការពារដែនអាកាស ១.១៩២គ្រឿង និងយុទ្ធោបករណ៍ជាច្រើនផ្សេងទៀត។

អ៊ុយក្រែន និងរុស្ស៊ី កម្រចេញផ្សាយតួលេខផ្លូវការពីអ្នកស្លាប់ក្នុងសង្រ្គាមណាស់។ លើកចុងក្រោយដែលរុស្ស៊ី រាយការណ៍ជាផ្លូវការពីរឿងនេះគឺនៅក្នុងខែកញ្ញា ឆ្នាំ២០២២ នៅពេលដែលទីក្រុងមូស្គូរាយការណ៍ថា មនុស្ស ៥.៩៣៧នាក់បានស្លាប់។

យោងតាមការសិក្សាថ្មីមួយដោយស្ថាប័នស្រាវជ្រាវក្នុងទីក្រុងវ៉ាស៊ីនតោន នៅដើមខែមិថុនាបានឱ្យដឹងថា ទាហានរុស្ស៊ីជិត ១លាននាក់ត្រូវបានសម្លាប់ ឬរងរបួសក្នុងសង្រ្គាមអ៊ុយក្រែន ហើយការខាតបង់របស់រុស្ស៊ី ទំនងជានឹងឈានដល់ ១លាននាក់ក្នុងរដូវក្តៅនេះ។

អ៊ុយក្រែន បានធ្វើបច្ចុប្បន្នភាពស្ថិតិរបស់ខ្លួននៅថ្ងៃទី១៦ ខែកុម្ភៈ ឆ្នាំ២០២៥ ដោយយោងតាមលោកប្រធានាធិបតី Volodymyr Zelensky បានឱ្យដឹងថា ទាហានអ៊ុយក្រែន ៤៦.០០០នាក់ត្រូវបានសម្លាប់ ហើយជិត ៣៨០.០០០នាក់ទៀតបានរងរបួស៕