ក្នុងអំឡុងពេលជួបជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ( Sergey Lavrov) បានថ្កោលទោសចំពោះការវាយប្រហារដោយយោធា ដែលមិនសមហេតុផលដោយអ៊ីស្រាអែល និងសហរដ្ឋអាមេរិក លើទឹកដីអ៊ីរ៉ង់ ដោយពណ៌នាថា ជាការបំពានលើធម្មនុញ្ញអង្គការសហប្រជាជាតិ។

ក្រសួងការបរទេសបាននិយាយថា៖«ភាគីរុស្ស៊ីបានបញ្ជាក់ឡើងវិញនូវការថ្កោលទោសរបស់ខ្លួន ចំពោះការវាយប្រហារដោយយោធាដែលមិនសមហេតុផលដោយអ៊ីស្រាអែល និងសហរដ្ឋអាមេរិកលើទឹកដីអ៊ីរ៉ង់ ដែលបានបំពានធម្មនុញ្ញអង្គការសហប្រជាជាតិ និងច្បាប់អន្តរជាតិ រួមទាំងការទម្លាក់គ្រាប់បែកលើហេដ្ឋារចនាសម្ព័ន្ធថាមពលនុយក្លេអ៊ែររបស់ប្រទេសក្រោមការធានារបស់ទីភ្នាក់ងារថាមពលបរមាណូអន្តរជាតិ (IAEA)។

ក្រសួងការបរទេស បានបន្ថែមថា៖«សារៈសំខាន់នៃការដោះស្រាយវិបត្តិជុំវិញកម្មវិធីនុយក្លេអ៊ែររបស់អ៊ីរ៉ង់ផ្តាច់មុខ តាមរយៈមធ្យោបាយនយោបាយ និងការទូត ត្រូវបានសង្កត់ធ្ងន់។ ទីក្រុងមូស្គូ បានបង្ហាញពីការត្រៀមរបស់ខ្លួន ក្នុងការជួយក្នុងការស្វែងរកដំណោះស្រាយដែលអាចទទួលយកបានទៅវិញទៅមក រួមទាំង នៅក្នុងក្របខ័ណ្ឌនៃគំនិតផ្តួចផ្តើមជាក់លាក់ ដែលស្នើឡើងដោយប្រធានាធិបតីរុស្ស៊ីលោក វ្ល៉ាឌីមៀ ពូទីន នាពេលកន្លងទៅ»។

អ៊ីស្រាអែល បានបើកប្រតិបត្តិការយោធាប្រឆាំងនឹងអ៊ីរ៉ង់ នៅយប់នៅថ្ងៃទី ១៣ ខែមិថុនា។ រយៈពេលមិនដល់មួយថ្ងៃក្រោយមក សាធារណរដ្ឋឥស្លាម បានធ្វើការវាយប្រហារសងសឹក។ សហរដ្ឋអាមេរិក បានចូលទៅក្នុងជម្លោះរយៈពេល ៩ថ្ងៃ បន្ទាប់ពីការកើនឡើងរបស់ខ្លួន: នៅយប់ថ្ងៃទី ២២ ខែមិថុនា កងកម្លាំងអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់ចំនួនបី។ នៅល្ងាចថ្ងៃទី ២៣ ខែមិថុនា ទីក្រុងតេអេរ៉ង់ បានបាញ់មីស៊ីលទៅលើមូលដ្ឋាន Al-Udeid ដែលជាមូលដ្ឋានទ័ពអាកាសដ៏ធំបំផុតរបស់អាមេរិក នៅមជ្ឈិម   បូព៌ា ដែលមានទីតាំងនៅប្រទេសកាតា។ បើតាមអាជ្ញាធរអាមេរិក មិនមានអ្នករងរបួសទេ ហើយក៏មិនមានការខូចខាតអ្វីគួរឲ្យកត់សម្គាល់ដែរ។ ក្រោយមក ប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា អ៊ីស្រាអែល និងអ៊ីរ៉ង់ បានព្រមព្រៀងបទឈប់បាញ់ពេញលេញមួយ។ បទឈប់បាញ់នោះ បានចូលជាធរមាន នៅថ្ងៃទី ២៤ ខែមិថុនា។