នៅក្នុងបទសម្ភាសន៍មួយដែលត្រូវបានចេញផ្សាយកាលពីថ្ងៃអាទិត្យ (ទី៦ ខែកក្កដា) មន្ត្រីជាន់ខ្ពស់មកពីក្រុមហាម៉ាស បានប្រាប់ប្រព័ន្ធផ្សព្វផ្សាយ BBC ថា បើតាមសេចក្ដីរាយការណ៍ ក្រុមដែលត្រូវបានចាត់ទុកជាអង្គការភេរវករមួយនេះ បានបាត់បង់ការគ្រប់គ្រងរបស់ខ្លួនប្រហែល ៨០ភាគរយ លើតំបន់ហ្កាហ្សា។

មន្ត្រីរូបនេះបានពន្យល់ប្រាប់ប្រព័ន្ធផ្សព្វផ្សាយ BBC ថា ហេដ្ឋារចនាសម្ព័ន្ធបញ្ជា និងគ្រប់គ្រងរបស់ក្រុមហាម៉ាស បានដួលរលំ បន្ទាប់ពីមានការវាយប្រហារផ្លូវអាកាសជាច្រើនខែរបស់អ៊ីស្រាអែល ដែលបានបំផ្លាញការដឹកនាំផ្នែកនយោបាយ យោធា និងសន្តិសុខរបស់ក្រុម។

មន្ត្រីរូបនេះបានប្រាប់ថា៖ «និយាយដោយស្មោះត្រង់ វាស្ទើរតែមិនមានអ្វីនៅសេសសល់ឡើយ សម្រាប់រចនាសម្ព័ន្ធសន្តិសុខ។ មេដឹកនាំភាគច្រើនប្រហែល ៩៥ភាគរយ ឥឡូវនេះ ស្លាប់ហើយ។ ឥស្សរជនសកម្មៗ ត្រូវបានសម្លាប់ទាំងអស់»។

មន្ត្រីក្រុមហាម៉ាសរូបនោះ បានប្រាប់ប្រព័ន្ធផ្សព្វផ្សាយ BBC ថា៖ «តាមហេតុផល គ្រប់យ៉ាងត្រូវបន្តរហូតដល់ទីបញ្ចប់។ លក្ខខណ្ឌទាំងអស់កើតឡើងក្នុងទិសដៅស្រប់គ្នា នោះគឺថា អ៊ីស្រាអែលមានប្រៀប ពិភពលោកនៅស្ងៀម របបអារ៉ាប់នៅស្ងៀម ក្រុមឧក្រិដ្ឋជននៅគ្រប់ទីកន្លែង ហើយសង្គមកំពុងដួលរលំ»។

លោកបានបញ្ជាក់បន្ថែមទៀតថា៖ «ខ្ញុំសូមបញ្ជាក់ឲ្យបានច្បាស់ថា ស្ថានភាពសន្តិសុខ បានដួលរលំទាំងស្រុង។ គ្មានការគ្រប់គ្រងនៅកន្លែងណាឡើយ»៕