ប្រមុខក្រុមហេសបូឡា និយាយថា ក្រុមនៅលីបង់មួយនេះ នៅតែបើកចំហ ចំពោះសន្តិភាព ប៉ុន្តែខ្លួននឹងមិនរំសាយអាវុធ ឬចុះញ៉មឡើយ រហូតដល់អ៊ីស្រាអែលបញ្ចប់ការវាយឆ្មក់តាមអាកាស និងដកចេញពីភាគខាងត្បូងលីបង់។ នៅឯកន្លែងប្រមូលផ្តុំ នៅជាយក្រុងភាគខាងត្បូងនៃទីក្រុង Beirut កាលពីថ្ងៃអាទិត្យ (ទី៦ ខែកក្កដា) សម្រាប់ពិធីបុណ្យ Ashura ដែលជាថ្ងៃដ៏សំខាន់មួយនៅក្នុងប្រតិទិនមូស្លីម Shia លោក Naim Qassem បានប្រាប់អ្នកគាំទ្ររាប់ពាន់នាក់នៅទីនោះថា៖ «យើងមិនអាចត្រូវបានគេស្នើសុំឲ្យបន្ទន់ជំហររបស់យើង ឬទម្លាក់អាវុធឡើយ ខណៈពេលដែលការឈ្លានពាន (របស់អ៊ីស្រាអែល) នៅតែបន្តមាន»។ 

អ៊ីស្រាអែលបានបើកការវាយប្រហារទ្រង់ទ្រាយធំលើប្រទេសលីបង់ កាលពីថ្ងៃទី៨ ខែតុលា ឆ្នាំ២០២៣ ពោលគឺមួយថ្ងៃបន្ទាប់ពីក្រុមហាហ៉ាសប៉ាឡេស្ទីន ដែលមានទាំងក្រុមហេសបូឡាជាសម្ព័ន្ធមិត្តផងដែរ បានវាយលុកដែនដីអ៊ីស្រាអែល ជាហេតុករណ៍ដែលបានសម្លាប់មនុស្សប្រហែល ១.១០០នាក់ និងចាប់ខ្លួនប្រហែល ២៥០នាក់ទៀតជាចំណាប់ថ្នូរ។ ការវាយប្រហាររបស់ក្រុមហាម៉ាសត្រូវបានតាមមកភ្លាមៗដោយការទម្លាក់គ្រាប់បែករបស់អ៊ីស្រាអែលទៅលើតំបន់ហ្កាហ្សាស្ទ្រីប ដែលមកទល់ពេលនេះបានសម្លាប់ជនជាតិប៉ាឡេស្ទីនជាង ៥៧.០០០នាក់ ភាគច្រើនជាស្ត្រី និងកុមារ។  

ហើយជាមួយគ្នានេះ បើយោងតាមទិន្នន័យផ្លូវការ បានឲ្យដឹងថា ការវាយប្រហារក្នុងពេលដំណាលគ្នារបស់អ៊ីស្រាអែលលើលីបង់ ដែលបានរាលដាល់ទៅជាសង្គ្រាមទ្រង់ទ្រាយធំ នៅខែកញ្ញា ឆ្នាំ២០២៤ បានសម្លាប់មនុស្សជាង ៤.០០០នាក់ ក្នុងនោះមានរួមទាំងមេដឹកនាំជាន់ខ្ពស់របស់ក្រុមហេសបូឡា ហើយជិត ១,៤លាននាក់ ត្រូវបម្លាស់ទីលំនៅ។ តែបទឈប់បាញ់ដែលសម្របសម្រួលដោយសហរដ្ឋអាមេរិក បានបញ្ចប់សង្គ្រាមនោះ នៅខែវិច្ឆិកា។ 

តែយ៉ាងណាក្ដី ចាប់តាំងពីមានបទឈប់បាញ់នោះ អ៊ីស្រាអែលបានបន្តកាន់កាប់ទីតាំងព្រំដែនយុទ្ធសាស្ត្រចំនួន ៥ នៅភាគខាងត្បូងលីបង់ ហើយបានធ្វើការវាយប្រហារតាមអាកាសស្ទើររាល់ថ្ងៃ ដែលខ្លួនប្រាប់ថា មានគោលបំណងរារាំងក្រុមហេសបូឡាកុំឲ្យកសាងសមត្ថភាពរបស់ខ្លួនឡើងវិញ។ បើយោងតាមក្រសួងសុខាភិបាលលីបង់ បានឲ្យដឹងថា ការវាយប្រហារទាំងនោះបានសម្លាប់មនុស្សប្រហែល ២៥០នាក់ និងរបួស ៦០០នាក់ទៀត ចាប់តាំងពីខែវិច្ឆិកា។ 

លោក Qassem បានបញ្ជាក់ថា អាវុធរបស់ក្រុមហេសបូឡា នឹងមិនស្ថិតនៅលើតុចរចាទេ ប្រសិនបើអ៊ីស្រាអែលមិន «ដកខ្លួនចេញពីដែនដីកាន់កាប់ បញ្ឈប់ការឈ្លានពាន និងដោះលែងអ្នកទោស ហើយការកសាងឡើងវិញ ត្រូវបានអនុញ្ញាតឲ្យចាប់ផ្តើមមាន»៕