អាជ្ញាធរក្នុងតំបន់ នៅថ្ងៃចន្ទ (ទី៧ ខែកក្កដា) នេះ បានឲ្យដឹងថា អគ្គិភ័យដែលបានឆាបឆេះអគារផ្ទះល្វែងមួយកន្លែង នៅក្នុងមជ្ឈមណ្ឌលពាណិជ្ជកម្មភាគខាងត្បូងនៃទីក្រុងហូជីមិញរបស់ប្រទេសវៀតណាម បានបណ្ដាលឲ្យមនុស្ស ៨នាក់ស្លាប់ ក្នុងនោះមានកុមារ ២នាក់ផងដែរ។

អាជ្ញាធរទីក្រុងហូជីមិញ បានឲ្យដឹងនៅក្នុងសេចក្តីថ្លែងការណ៍មួយថា អគ្គិភ័យនេះបានឆាបឆេះឡើងកាលពីយប់ថ្ងៃទី៦ ខែកក្កដា នៅជាន់ផ្ទាល់ដីនៃប្លុកផ្ទះល្វែងកម្ពស់ ៥ជាន់ ដោយមានអ្នកស្លាប់ ៨នាក់ ដោយសារស្រូបផ្សែងចូល។

យោងតាមសេចក្តីរាយការណ៍របស់ប្រព័ន្ធផ្សព្វផ្សាយ បានឲ្យដឹងថា អ្នកស្រុកបាននាំគ្នាជួយពន្លត់អណ្តាតភ្លើង ដោយប្រើបំពង់ពន្លត់អគ្គិភ័យ ខណៈដែលសំឡេងផ្ទុះត្រូវបានឮពីខាងក្នុងផ្ទះល្វែងនោះ មុនពេលក្រុមសង្គ្រោះបន្ទាន់ទៅដល់។

អាជ្ញាធរបានប្រាប់ថា មូលហេតុនៃការអគ្គិភ័យនេះ កំពុងស្ថិតក្នុងការស៊ើបអង្កេត។ នៅមុននេះ អគ្គិភ័យបណ្តាលឲ្យមានអ្នកស្លាប់ បាននាំឲ្យទៅដល់ការចាប់ខ្លួន និងកាត់ទោសមនុស្សយ៉ាងច្រើន នៅក្នុងប្រទេសវៀតណាម។

ជាក់ស្ដែង មនុស្ស ៨នាក់ ត្រូវជាប់ពន្ធនាគារក្នុងឆ្នាំ២០២៥ ពាក់ព័ន្ធនឹងអគ្គិភ័យនៅផ្ទះល្វែង ក្នុងទីក្រុងហាណូយឆ្នាំ២០២៣ ដែលបានសម្លាប់មនុស្សចំនួន ៥៦នាក់ ដោយនេះជាគ្រោះអគ្គិភ័យដ៏អាក្រក់បំផុតរបស់ប្រទេសជាលើកដំបូង ក្នុងរយៈពេល ២ទសវត្សរ៍។ នៅខែធ្នូ ឆ្នាំ២០២៤ នគរបាលបានចាប់ខ្លួនជនសង្ស័យជាអ្នកដុតហាងខារ៉ាអូខេមួយកន្លែង នៅទីក្រុងហាណូយ ដែលបានសម្លាប់មនុស្ស ១១នាក់៕