ប្រធានាធិបតីអ៊ុយក្រែន លោក Volodymyr Zelensky បានពិភាក្សាអំពីការផ្លាស់ប្តូរឯកអគ្គរដ្ឋទូតបច្ចុប្បន្នប្រចាំនៅសហរដ្ឋអាមេរិក ក្នុងអំឡុងពេលសន្ទនាតាមទូរសព្ទជាមួយប្រធានាធិបតីអាមេរិក លោក Donald Trump កាលពីថ្ងៃទី៤ ខែកក្កដា។ នេះបើយោងតាមបុគ្គលដែលដឹងអំពីបញ្ហានេះ។

ដោយនិយាយក្នុងលក្ខខណ្ឌមិនបញ្ចេញឈ្មោះ ដោយសារការនេះគឺជាការពិភាក្សាសម្ងាត់ បុគ្គលនោះ បានប្រាប់ថា លោកនាយករដ្ឋមន្ត្រី Denys Shmyhal ស្ថិតនៅក្នុងបញ្ជីបេក្ខជនឈ្មោះ នាពេលខាងមុខ ដើម្បីក្លាយជាបេសកជនរបស់ទីក្រុងគីវ ប្រចាំទីក្រុងវ៉ាស៊ីនតោន រួមជាមួយឧបនាយករដ្ឋមន្ត្រី លោកស្រី Olha Stefanishyna រដ្ឋមន្ត្រីការពារជាតិ លោក Rustem Umerov និងរដ្ឋមន្ត្រីថាមពល លោក German Galushchenko។

ដំណឹងនៃការដោះដូរបេសកជនជំនួសតំណែងបច្ចុប្បន្នរបស់លោកស្រី Oksana Markarova កើតឡើងនៅពេលវេលាដ៏ផុយស្រួយក្នុងទំនាក់ទំនងអ៊ុយក្រែនជាមួយសហរដ្ឋអាមេរិក។

រដ្ឋបាលរបស់លោក Trump កាលពីសប្តាហ៍មុន បានបញ្ឈប់ការបញ្ជូនគ្រាប់កាំភ្លើងធំ និងប្រព័ន្ធការពារដែនអាកាសទៅអ៊ុយក្រែន ជាចំណាត់ការដែលបានធ្វើឲ្យរដ្ឋាភិបាលរបស់លោក Zelensky និងសម្ព័ន្ធមិត្តងឿងឆ្ងល់យ៉ាងខ្លាំង។

យ៉ាងណាក្ដី បុគ្គលដែលដឹងពីគ្រោងការរបស់ទីក្រុងគីវ បានប្រាប់ថា លោក Zelensky បានណែនាំក្រសួងការបរទេសរបស់លោកឲ្យពិភាក្សា អំពីការតែងតាំងឯកអគ្គរដ្ឋទូតបន្ទាប់របស់អ៊ុយក្រែនជាមួយភាគីអាមេរិក៕