ប្រតិបត្តិករនាវា បានឲ្យដឹងថា នាវិកចំនួន ១៩នាក់ មានសុវត្ថិភាពជាធម្មតា ហើយនឹងទៅដល់ប្រទេសជីប៊ូទី (Djibouti) នៅយប់ថ្ងៃចន្ទ (ទី៧ ខែកក្កដា) នេះ បន្ទាប់ពីនាវាដឹកទំនិញក្រិករបស់ពួកគេ ដែលបានរងការខូចខាតយ៉ាងធ្ងន់ធ្ងរ នៅសមុទ្រក្រហមដោយសារការវាយប្រហារជាច្រើនដង ដែលភាគច្រើនទំនងជាស្នាដៃរបស់ក្រុមសកម្មប្រយុទ្ធហ៊ួទី។

តែយ៉ាងណាក្ដី លោក Michael Bodouroglou តំណាងប្រតិបត្តិករក្រុមហ៊ុន Stem Shipping បានប្រាប់ឲ្យដឹងថា ជោគវាសនារបស់នាវា Magic Seas ដែលមានទង់ជាតិលីបេរីយ៉ា គឺមិនច្បាស់លាស់នោះទេ ដោយប្រឈមនឹងការលិច។

គួរបញ្ជាក់ថា ការវាយប្រហារកាលពីថ្ងៃអាទិត្យ (ទី៦ ខែកក្កដា) នៅឆ្នេរសមុទ្រភាគនិរតីនៃប្រទេសយេម៉ែន គឺជាឧប្បត្តិហេតុដំបូងដែលត្រូវបានរាយការណ៍ នៅក្នុងច្រករបៀងដឹកជញ្ជូនដ៏សំខាន់នេះ គិតចាប់តាំងពីពាក់កណ្តាលខែមេសា។ នៅក្នុងការវាយឆ្មក់ដែលមានរយៈពេលជាង ៤ម៉ោង នាវា Magic Seas ត្រូវបានរងការប្រហារដោយកាំភ្លើង និងគ្រាប់បេ ក៏ដូចជាដោយយានដ្រូនសមុទ្រ និងមីស៊ីល។

លោក Bodouroglou បានប្រាប់សារព័ត៌មាន Reuters ថា នាវានេះដឹកដែក និងជីពីប្រទេសចិនទៅកាន់ទួរគី ហើយក្រុមហ៊ុន Stem Shipping មិនបានទទួលការព្រមានអំពីការវាយប្រហារនេះទេ៕