​អាមេរិក៖ យោង​តាម​ទិន្នន័យ​ចុង​ក្រោយពី​ក្រសួងសុខាភិបាល ​និង​ប្រជា​សេវា​សហរដ្ឋអាមេរិកឲ្យដឹងថា បច្ចុប្បន្ន​មាន​មនុស្ស​ជាង ១០៣,០០០​នាក់បាន​ចូល​សម្រាក​ព្យាបាល​ជំងឺ​ COVID-19 នៅ​សហរដ្ឋ​អាមេរិក ជា​ចំនួន​សរុប​លើកដំបូង​ដែល​បាន​កើន​ឡើង​ដល់​លេខ ​៦​ខ្ទង់​ក្នុង​រយៈពេល​ជិត ៤​ខែ។

​ចំនួន​អ្នកជំងឺ Covid-19 ចូល​សម្រាក​ព្យាបាល​នៅ​មន្ទីរពេទ្យបាន​កើន​ឡើង​ខ្ពស់​បំផុត​ដល់​ទៅ​ជាង ​១៤២,០០០​នាក់​ប្រហែល​រយៈ​ពេល ​១ឆ្នាំមុន​គឺ​កាលពី​ថ្ងៃ​ទី​១៤​ ខែ​មករា ឆ្នាំ​២០២១ និង​ខ្ពស់​បំផុត​ចុងក្រោយ​កាលពី​ថ្ងៃ​ទី​១១​ ខែ​កញ្ញា​មាន​ជាង ១០០,០០០​នាក់។ ចំនួន​អ្នកជំងឺ​ចូល​សម្រាក​ព្យាបាល​នៅ​មន្ទីរពេទ្យ​សរុប​បាន​កើន​ឡើង​ប្រហែល ៤៥,០០០នាក់​កាលពីដើម​ខែ​វិច្ឆិកា​ឆ្នាំមុន ប៉ុន្តែ​បាន​កើន​ឡើងជា​បន្តបន្ទាប់​ចាប់​តាំង​ពី​ពេលនោះ​មក ហើយ​បាន​ហក់​ឡើង​ខ្ពស់​កាលពី​សប្ដាហ៍​មុន។ កាលពី​ថ្ងៃ​ចន្ទ​សប្ដាហ៍​មុន​ក្រសួង​សុខាភិបាល និង​ប្រជាសេវា​បាន​រាយការណ៍ថា ​អ្នកជំងឺ​ចូល​សម្រាក​ព្យាបាល​នៅ​មន្ទីរពេទ្យ​ចំនួន ៧១,០០០​នាក់​។​

​រដ្ឋ​នានា​ក៏​កំពុង​រាយការណ៍​ពី​ការ​កើន​ឡើង​នៃ​ចំនួន​កុមារ​ដែល​សម្រាក​នៅ​មន្ទីរពេទ្យ​ផង​ដែរ​។ នៅ​រដ្ឋ Illinois ចំនួន​នេះ​បាន​កើន​ឡើង​ជិត​ ៣​ដង​ចាប់​តាំង​ពី​ដើម​ខែ​ធ្នូ​មក នេះ​បើ​តាម​ការ​ឲ្យ​ដឹង​ពី​អភិបាល​រដ្ឋ​ដែល​បាន​និយាយ​កាលពី​ថ្ងៃ​ចន្ទ​។ គណៈកម្មការ​សុខភាព​រដ្ឋ New Jersey លោក Judy Persichilli បាន​និយាយ​ថា ចំនួន​សរុប​នៃ​មន្ទីរពេទ្យ​កុមារ​នៅ​ក្នុង​រដ្ឋ​នោះ បាន​កើន​ឡើង​ស្ទើរតែ​ទ្វេដង​ក្នុង​រយៈពេល ៧​​ថ្ងៃ​។​ គិត​ត្រឹម​រសៀល​ថ្ងៃ​អង្គារ​នេះ សហរដ្ឋអាមេរិក​មាន​ករណី​ឆ្លង​វីរុស COVID-19 សរុប​ចំនួន ៥៧,១២៣,៣១៩​នាក់ និង​ស្លាប់​សរុបចំនួន ៨៤៨​,៨៧៣​នាក់​៕

អត្ថបទ៖ សុខមាន