ប្រធានាធិបតីអាមេរិក លោក Donald Trump ដែលធ្វើជាម្ចាស់ផ្ទះទទួលលោកនាយករដ្ឋមន្ត្រីអ៊ីស្រាអែល Benjamin Netanyahu នៅសេតវិមានកាលពីថ្ងៃចន្ទ (០៧ កក្កដា) បាននិយាយថា សហរដ្ឋអាមេរិក បានចង្អុលបង្ហាញពីវឌ្ឍនភាពលើកិច្ចខិតខំប្រឹងប្រែងដ៏ចម្រូងចម្រាសមួយ ដើម្បីផ្លាស់ប្តូរប្រជាជនប៉ាឡេស្ទីនចេញពីតំបន់ហ្កាហ្សា ពិភាក្សាបទឈប់បាញ់អ៊ីស្រាអែល-ហាម៉ាស និងបានកំណត់ពេលពិភាក្សានុយក្លេអ៊ែរជាមួយអ៊ីរ៉ង់។

ថ្លែងទៅកាន់អ្នកសារព័ត៌មាននៅមុនអាហារពេលល្ងាចរវាងក្រុមមន្ត្រីអាមេរិក និងអ៊ីស្រាអែល លោក Netanyahu បាននិយាយថា សហរដ្ឋអាមេរិក និងអ៊ីស្រាអែល កំពុងធ្វើការជាមួយប្រទេសផ្សេងទៀតដែលនឹងផ្តល់ឱ្យជនជាតិប៉ាឡេស្ទីននូវ "អនាគតដ៏ល្អប្រសើរ" ដោយលើកឡើងថា អ្នកស្រុកហ្កាហ្សា អាចផ្លាស់ទីលំនៅទៅប្រទេសជិតខាង។

លោក Trump ដែលដំបូងឡើយបង្ហាញការបដិសេធចំពោះលោក Netanyahu អំពីការផ្លាស់ទីលំនៅរបស់ជនជាតិប៉ាឡេស្ទីន បាននិយាយថា ប្រទេសនានាជុំវិញអ៊ីស្រាអែលកំពុងជួយលើរឿងនេះ។ គួររម្លឹកថា ប្រធានាធិបតីអាមេរិករូបនេះបានបង្ហើបគំនិតផ្លាស់ទីលំនៅប្រជាជនប៉ាឡេស្ទីន និងចូលកាន់កាប់តំបន់ហ្កាហ្សា កាលពីដើមឆ្នាំនេះ។ ពលរដ្ឋហ្កាហ្សាបានរិះគន់គំនិតនោះយ៉ាងខ្លាំង ហើយបានប្តេជ្ញាថានឹងមិនចាកចេញពីផ្ទះសម្បែងរបស់ពួកគេនៅក្នុងតំបន់ឆ្នេរដ៏តូចចង្អៀតនេះឡើយ។

លោក Trump និងលោក Netanyahu បានជួបប្រជុំគ្នានៅទីក្រុងវ៉ាស៊ីនតោន ខណៈពេលដែលមន្រ្តីអ៊ីស្រាអែល ធ្វើការចរចាដោយប្រយោលជាមួយក្រុមហាម៉ាស ក្នុងបំណងធានាបទឈប់បាញ់ហ្កាហ្សា ដែលអាមេរិកជាអ្នកសម្របសម្រួល និងកិច្ចព្រមព្រៀងដោះលែងចំណាប់ថ្នូរ។ ដំណើរទស្សនកិច្ចរបស់លោក Netanyahu នេះបានធ្វើឡើងបន្ទាប់ពីការព្យាកររបស់លោក Trump នៅមុនកិច្ចប្រជុំរបស់មេដឹកនាំទាំងពីរថា កិច្ចព្រមព្រៀងឈប់បាញ់ហ្កាហ្សា អាចនឹងសម្រេចបានក្នុងសប្តាហ៍នេះ៕