អង្គការមិនមែនរដ្ឋាភិបាលនៅប្រទេសអ៊ុយក្រែន ព្រមានថា រោងចក្រថាមពលនុយក្លេអ៊ែរ Zaporizhzhia នៅភាគខាងត្បូងអ៊ុយក្រែន ស្ថិតក្នុងហានិភ័យខ្ពស់នៃគ្រោះថ្នាក់នុយក្លេអ៊ែរ។ មន្ត្រីមកពីអង្គការមិនមែនរដ្ឋាភិបាលអ៊ុយក្រែនចំនួនពីរ បានពិពណ៌នាអំពីស្ថានភាពបច្ចុប្បន្ននៅរោងចក្រដែលកាន់កាប់ដោយរុស្ស៊ីក្នុងអំឡុងពេលសន្និសីទសារព័ត៌មានមួយកាលពីថ្ងៃចន្ទ ដោយក្រុមនេះបានពិនិត្យមើលអ្វីដែលគេចាត់ទុកថាជាឧក្រិដ្ឋកម្មសង្គ្រាមរបស់រុស្ស៊ី ដោយផ្អែកលើរូបភាពផ្កាយរណបនិងការសម្ភាសន៍ជាមួយអ្នកពាក់ព័ន្ធ។

សន្និសីទសារព័ត៌មានរបស់ក្រុមនេះ បានធ្វើឡើងបន្ទាប់ពីទីភ្នាក់ងារថាមពលអាតូមិកអន្តរជាតិ បានរាយការណ៍ថាបណ្តាញថាមពលខាងក្រៅទាំងអស់ដែលផ្គត់ផ្គង់អគ្គិសនីដល់រោងចក្រ បានធ្លាក់ចុះរយៈពេលជាច្រើនម៉ោងកាលពីថ្ងៃសុក្រសប្តាហ៍មុន។ អង្គការមិនមែនរដ្ឋាភិបាលបាននិយាយថាពួកគេកំពុងស៊ើបអង្កេតពីមូលហេតុដែលបណ្ដាលឲ្យមានការដាច់ចរន្តអគ្គិសនី។ ទោះជាយ៉ាងណា ក្រុមទាំងនេះបាននិយាយថា ពួកគេដឹងថាការដាច់ចរន្តអគ្គិសនីនេះកើតឡើងស្របនឹងការប្រកាសអាសន្ននៃការវាយប្រហារតាមអាកាសនៅក្នុងតំបន់។

អង្គការមិនមែនរដ្ឋាភិបាលបានព្រមានថា រោងចក្រ Zaporizhzhia មានហានិភ័យខ្ពស់នៃគ្រោះថ្នាក់ ខណៈបុគ្គលិករបស់ខ្លួនត្រូវបានគេធ្វើទារុណកម្ម ហើយកងទ័ពរុស្ស៊ីបានចល័តយោធានៅរោងចក្រ ដោយដាក់អាវុធរបស់ពួកគេនៅខាងក្នុង និងជុំវិញបរិវេណនោះ។

មន្ត្រីអង្គការមិនមែនរដ្ឋាភិបាលម្នាក់និយាយថា យោធារុស្ស៊ីរំលោភសិទ្ធិមនុស្ស និងកំពុងគំរាមកំហែងដល់សុវត្ថិភាពនុយក្លេអ៊ែរ និងបាននិយាយសង្កត់ធ្ងន់លើតម្រូវការសម្រាប់សហគមន៍អន្តរជាតិទាំងមូលដើម្បីពិចារណាពីរបៀបឆ្លើយតបទៅនឹងឧក្រិដ្ឋកម្មសង្គ្រាមដែលបានប្រព្រឹត្តដោយយោធារបស់រុស្ស៊ី ព្រមទាំងការដោះស្រាយឧបទ្ទវហេតុនុយក្លេអ៊ែរដែលអាចកើតមាន។