ភាគហ៊ុនរបស់សហរដ្ឋអាមេរិកបានធ្លាក់ចុះកាលពីថ្ងៃចន្ទដើមសប្ដាហ៍នេះ ខណៈប្រធានាធិបតី Donald Trump បានប្រកាសពីភាពច្របូកច្របល់នៃការដំឡើងពន្ធលើបណ្តាប្រទេសចំនួន១៤ រួមទាំងប្រទេសជប៉ុន កូរ៉េខាងត្បូង និងអាហ្វ្រិកខាងត្បូងផងដែរ។

ភាគហ៊ុន Dow ធ្លាក់ចុះទាបជាង៤២២ពិន្ទុ ឬ ០,៩៤% ។ S&P 500 បានធ្លាក់ចុះ ០,៧៩% ហើយភាគហ៊ុនក្រុមហ៊ុនបច្ចេកវិទ្យាដ៏ធំ Nasdaq Composite បានចុះ០,៩២ %។ សន្ទស្សន៍សំខាន់ៗទាំងបីបានមើលឃើញថ្ងៃដ៏អាក្រក់បំផុតរបស់ខ្លួនក្នុងរយៈពេលប្រហែលបីសប្តាហ៍។ ទន្ទឹមនឹងនេះ ភាគហ៊ុននៅតំបន់អាស៊ី និងអឺរ៉ុប ក៏បានធ្លាក់ចុះផងដែរនៅថ្ងៃអង្គារនេះ។

ភាគហ៊ុននានាបានធ្លាក់ចុះនៅពាក់កណ្តាលថ្ងៃត្រង់ បន្ទាប់ពីលោក Trump បានប្រកាសពន្ធ២៥ % លើប្រទេសជប៉ុន និងកូរ៉េខាងត្បូង ដែលគ្រោងនឹងចូលជាធរមាននៅថ្ងៃទី ១ ខែសីហា។ ភាគហ៊ុនបានបន្តធ្លាក់ថ្លៃនៅពេលរសៀល ខណៈលោក Trump បានប្រកាសពន្ធពី២៥% ដល់៤០% លើប្រទេសមួយចំនួនរួមទាំង   មីយ៉ាន់ម៉ា ម៉ាឡេស៊ី កាហ្សាក់ស្ថាន ឡាវ និងអាហ្វ្រិកខាងត្បូងផងដែរ។

លោកTrump បានបង្ហោះសេចក្ដីជូនដំណឹងលើបណ្ដាញសង្គម Truth Social ដោយគូសបញ្ជាក់អំពីការដំឡើងពន្ធ ដែលដាច់ដោយឡែកពីពន្ធតាមវិស័យ។ អត្រាពន្ធអាចត្រូវបានកែប្រែ វាអាចខ្ពស់ជាងនេះ ឬទាបជាងនេះ នេះបើយោងតាមលិខិត។

ភាគហ៊ុននានាបានបើកក្នុងតម្លៃទាបជាង ខណៈភាគហ៊ុន Wall Street ពិចារណាផែនការរបស់រដ្ឋបាលលោក Trump ក្នុងការប្រកាសកិច្ចព្រមព្រៀងពាណិជ្ជកម្មថ្មី ឬជូនដំណឹងដល់ប្រទេសមួយចំនួនអំពីអត្រាពន្ធថ្មី។ លោក Trump កាលពីថ្ងៃអាទិត្យបាននិយាយថាសេតវិមាននឹងផ្ញើលិខិតស្ដីពីការដំឡើងពន្ធ ទៅកាន់ប្រទេសនានានៅថ្ងៃចន្ទពេលថ្ងៃត្រង់សប្ដាហ៍នេះ។ លោក Trump បានប្រាប់អ្នកសារព័ត៌មានកាលពីថ្ងៃសុក្រថា លិខិតនឹងបង្ហាញពីអត្រាពន្ធថ្មីដែលបានកំណត់អនុវត្តនៅថ្ងៃទី១ ខែសីហាខាងមុខ។ 

សន្ទស្សន៍ប្រាក់ដុល្លារអាមេរិក មានភាពរឹងមាំ ធៀបនឹងរូបិយប័ណ្ណបរទេសសំខាន់ៗចំនួនប្រាំមួយ ដោយបានកើនឡើង០,៣% ។ ប្រាក់យ៉េនរបស់ជប៉ុន ប្រាក់វ៉ុនរបស់កូរ៉េខាងត្បូង និងប្រាក់ Rand របស់អាហ្រ្វិកខាងត្បូងបានធ្លាក់ចុះ ធៀបនឹងប្រាក់ដុល្លារ៕