រដ្ឋបាលរបស់លោកប្រធានាធិបតី Donald Trump បានលុបចោលការកំណត់អង្គការភេរវកម្មបរទេសសម្រាប់រណសិរ្ស al-Nusrah ដែលត្រូវបានគេស្គាល់ថា Hay'at Tahrir al-Sham(HTS) នេះបើយោងទៅតាមអនុស្សរណៈរបស់ក្រសួងការបរទេស ជាចំណាត់ការដ៏សំខាន់មួយនៅពេលដែលក្រុងវ៉ាស៊ីនតោន ឈានទៅរកការបន្ធូរបន្ថយទណ្ឌកម្មលើប្រទេសស៊ីរី។

អនុស្សរណៈចុះថ្ងៃទី២៣ ខែមិថុនា ត្រូវបានចុះហត្ថលេខាដោយរដ្ឋមន្ត្រីក្រសួងការបរទេសសហរដ្ឋអាមេរិក លោក Marco Rubio។ ចំណាត់ការនេះ កើតឡើងមួយសប្តាហ៍បន្ទាប់ពីលោក Trump បានចុះហត្ថលេខាលើក្រឹត្យដែលបញ្ចប់កម្មវិធីដាក់ទណ្ឌកម្មរបស់សហរដ្ឋអាមេរិកលើប្រទេសស៊ីរី ដើម្បីជួយបញ្ចប់ភាពឯកោរបស់ប្រទេសនេះពីប្រព័ន្ធហិរញ្ញវត្ថុអន្តរជាតិ និងការកសាងតាមការសន្យារបស់ទីក្រុងវ៉ាស៊ីនតោន ដើម្បីជួយកសាងប្រទេសនេះឡើងវិញបន្ទាប់ពីសង្គ្រាមស៊ីវិលដ៏មហន្តរាយ។

លោក Rubio បានសរសេរនៅក្នុងអនុស្សរណៈនោះថា «ក្នុងការពិភាក្សាជាមួយរដ្ឋអាជ្ញា និងរដ្ឋមន្ត្រីរតនាគារ ខ្ញុំសូមលុបចោលការកំណត់ក្រុមរណសិរ្យ al-Nusrah ដែលត្រូវបានគេស្គាល់ថា Hay'at Tahrir al-Sham (HTS) ថាជាអង្គការភេរវកម្មបរទេស»។

ក្រុមHayat Tahrir al-Sham ឬ HTS កាលពីពេលមុនជាសាខារបស់ក្រុមអាល់កៃដានៅប្រទេសស៊ីរី។ កាលពីខែធ្នូ ប្រធានាធិបតីស៊ីរី លោក Ahmed al-Sharaa បានដឹកនាំក្រុម HTS នេះ ដែលបានរួមគ្នាជាមួយក្រុមឧទ្ទាមអ៊ីស្លាមនិយមផ្សេងទៀតធ្វើការវាយលុកលឿនដូចផ្លេកបន្ទោរបណ្តេញអតីតប្រធានាធិបតីស៊ីរី លោក Bashar al-Assad ។

ក្រុម HTS របស់ លោក Sharaa បានផ្តាច់ទំនាក់ទំនងជាមួយក្រុម al-Qaeda ជាច្រើនឆ្នាំកន្លងមកហើយនិងបាននិយាយថា ខ្លួនមានបំណងកសាងប្រទេសស៊ីរីដែលរួមបញ្ចូលគ្នា និងលទ្ធិប្រជាធិបតេយ្យ។